Kuri uyu wa gatandatu tariki ya 11 Ukuboza 2021, ba Guverineri Nyirarugero Dancille w'Intara y'Amajyaruguru na Emmanuel Gasana w'Intara y'Iburasirazuba, Inzego z'umutekano zikorera muri izi Ntara zombi, Abayobozi b'Uturere twa Burera, Gicumbi na Nyagatare ndetse n'Abanyamabanga Nshingwabikorwa b'Imirenge yo muri utu turere ikora ku mupaka, bahuriye mu nama mu Karere ka Gicumbi, yari igamijwe kurebera hamwe icyakorwa mu guca burundu ibyaha byambukiranya umupaka. Iyi nama yaje ikurikira iyabereye mu Ntara y’Iburasibazuba mu kwezi kwa Nyakanga 2021, aho izi Ntara zombi zatangiye imikoranire igamije gushakira umuti ibibazo bikigaragara mu mirenge ikora ku mupaka, cyane cyane ibyaha byambukiranya imipaka ndetse no gukomeza guteza imbere imibereho y'umuturage.

Nk’uko byagaragajwe muri iyi nama, imyanzuro yafatiwe mu nama y’ubushize yatanze umusaruro ufatika mu gukumira no kurwanya ibyaha, birimo ibiyobyabwenge, magendu, kwambuka umupaka binyuranyije n'amategeko ndetse no mu rwego rwo gukomeza guteza imbere imibereho myiza y'abaturage. Mu bikorwa byishimirwa bikubiye mu myanzuro y’ubushize, harimo guhugura urubyiruko ruzwi ku izina ry’“Imboni z’Umutekano”, rufite inshingano zo kunganira mu bikorwa byo gukumira no kurwanya ibiyabyabwenge, magendu ndetse no kwambuka umupaka ku buryo bunyuranyije n’amateko, hibandwa cyane cyane ku kurinda ibyambu n’ahantu hari ibyuho hakunze guca ibyobyabwenge na magendu. Hagagarajwe ko nyuma y’inama yahuje izi mpande zombi yo mu kwezi kwa Nyakanga 2021, hahuguwe abagera ku gihumbi na mirongo irindwi mu Ntara y’Amajyaruguru mu gihe mu Ntara y’Iburasizuba hahuguwe abagera kuri magana ane na bibiri kandi ko bose binjiye muri izo nshingano.

Mu rwego rwo kuziba ibyuho bikigaragara mu guca burundu ibyo bikorwa bitemewe mu gihugu cyacu, nyuma kandi yo kungurana ibitekerezo, abitabiriye inama bafashe umwanzuro wo gutegura ibikorwa by'ubukangurambaga bihuriweho, bizamara amezi kandi bishingiye ku guhindura imyumvire y’umuturage ku bijyanye n’ibiyobyabwenge, magendu no kwambuka umupaka mu buryo bunyuranyije n’amategeko.

Abitabiriye iyi nama basabye kandi ko hagomba gushyirwa imbaraga mu kumenya no gukurikirana ba nyirabayazana mu kwinjiza mu gihugu no gucuruza ibiyobyabwenge na magendu. Kuri iyi ngingo, Guverineri Gasana yagize ati “Bariya bantu bakora magendu cyangwa abakoresha inzira zitemewe n’abaca muri ibyo byambu hari abantu bashyira ibintu bakomeye, turagira ngo rero dukurikirane kugera kuri wa muntu ubigura uba watumye abo bantu babikora.”.