Kuri uyu wa gatandatu usoza ukwezi kwa Werurwe 2026, Guverineri w’Intara y’Amajyaruguru, Mugabowagahunde Maurice, ari kumwe n’Abadepite Kayigire Térence na Izere Ingrid Marie Parfaite, bifatanyije n’abaturage b’Akarere ka Gakenke mu muganda rusange wabereye mu Murenge wa Cyabingo, Akagari ka Muramba.

Uyu muganda wibanze ku gutunganya umuhanda uhuza Utugari twa Muramba na Muhoro, mu rwego rwo kunoza ibikorwaremezo no korohereza abaturage mu ngendo n’ikorwa ry’imirimo yabo ya buri munsi.

Witabiriwe kandi n’Umunyamabanga Nshingwabikorwa w’Intara y’Amajyaruguru, Ngendahimana Pascal, inzego z’umutekano ku rwego rw’Intara n’Akarere, Umuyobozi w’Akarere ka Gakenke, Mukandayisenga Vestine ndetse n’abandi bayobozi batandukanye, bagaragaje ubufatanye n’abaturage mu bikorwa by’iterambere.

Nyuma y’umuganda, abayobozi bashimiye abaturage b’Akarere ka Gakenke uruhare bagize mu gushyira mu bikorwa imihigo ya 2024–2025, byatumye aka karere kaza ku mwanya wa kane ku rwego rw’Igihugu. Bashimangiye ko uwo mwanya ari igihamya cy’ubufatanye n’umurava w’abaturage, babasaba gukomeza uwo muhate.

Abaturage basabwe gukomeza gukora cyane bakiteza imbere, birinda amakimbirane ashobora guteza umutekano muke no kudindiza iterambere ry’imiryango. Banashishikarijwe kwimakaza umuco wo kuganira no kujya inama, bagakemura ibibazo mu bwumvikane, no kurangwa n’isuku aho batuye n’aho bakorera.

By’umwihariko, abayobozi bibukije abaturage gukomeza kuba maso muri ibi bihe by’imvura nyinshi, bakirinda ibiza no kubahiriza amabwiriza atangwa n’inzego zibishinzwe kugira ngo harindwe ubuzima n’ibyabo.

Basobanuye kandi impinduka ziherutse kuba muri gahunda ya Mituweli (Mutuelle de Santé), basaba abaturage kwihutira kwishyura ubwisungane mu kwivuza bw’umwaka wa 2026–2027. Abafite ibibazo bijyanye n’amafaranga y'umusanzu bagomba kwishyura, bagiriwe inama yo kwegera ubuyobozi bw’Akagari kugira ngo bafashwe.

Uyu muganda wabaye umwanya mwiza wo gukomeza gushimangira ubufatanye hagati y’abaturage n’abayobozi, hagamijwe guteza imbere imibereho myiza n’iterambere rirambye ry’Akarere ka Gakenke n’Intara y’Amajyaruguru muri rusange.