Ku gicamunsi cyo kuri uyu wa kabiri tariki ya 11 Werurwe 2025 mu Karere ka Rulindo hafunguwe ku mugaragaro ibikorwaremezo by'umushinga ugamije gukwirakwiza amashanyarazi mu baturage, igikorwa cyabereye mu Murenge wa Tumba, Akagari ka Taba. Ni muri urwo rwego abaturage basabwe kurinda no kubungabunga ibyo bikorwaremezo byabegerejwe kuko ari bo ba mbere bifitiye akamaro.

Mu nama yakoranye n’abaturage b’Akagari ka Taba, Guverineri w’Intara y’Amajyaruguru yabamenyesheje ko uwo mushinga wo gukwirakwiza amashanyarazi ugamije kuyageza ku ngo zigera ku 12,000 zo mu Karere ka Rulindo zitari ziyafite, aho biteganyijwe ko bitarenze Ukwezi kwa Kamena 2025 izo ngo zizaba zamaze kuyahabwa. 

Yaboneyeho kubasaba kurinda no kubungabunga ibyo bikorwaremezo by'amashanyarazi begerejwe, bitabira gukora amarondo uko bikwiye no kubibyaza umusaruro bikabafasha kwiteza imbere ariko na none bakirinda kubicokoza kubera ko bishobora kugira ingaruka ku buzima bwabo, birimo no kuba byabambura ubuzima.

Guverineri Mugabowagahunde yasabye kandi abo baturage gufatanya mu rugamba rwo kwivana mu bukene, bakabikora ku buryo nta muturage n'umwe usigara inyuma, kwihutisha ibikorwa by'igihembwe cy'ihinga 2025 B kuko imvura izacika kare, kwitabira guhinga imbuto n'imboga mu rwego rwo kurwanya imirire mibi n'igwingira no kwirinda ubusinzi n'ibiyobyabwenge kuko bisubiza inyuma iterambere ry'imiryango.