Kuri uyu wa kane tariki ya 12 Nzeri 2024 mu Karere ka Rulindo hatangijwe ku mugaragaro igihembwe cy’ihinga 2025 A. Iki gikorwa cyabereye mu gishanga cya Bahimba ku ruhande rw’Umurenge wa Bushoki, Akagari ka Gasiza, kikaba cyibanze ku gutera igihingwa cy’ibigori.

Iki gikorwa cyitabiriwe na Guverineri w’Intara y’Amajyaruguru, Mugabowagahunde Maurice, ari na we wari Umushyitsi Mukuru, Ubuyobozi bw’Akarere ka Rulindo, Inzego z’Umutekano, abafatanyabikorwa batandukanye, barimo Solid Africa, HoReCo, abahagarariye Ikigo cy’Igihugu gishinzwe iterambere ry’ubuhinzi n’ubworozi ndetse n'abaturage bibumbiye muri Koperative COVAMABA bahinga mu gishanga cya Bahimba.

Mu butumwa bwe, Guverineri w'Intara y'Amajyaruguru yashimiye abafatanyabikorwa bose mu rwego rw'ubuhinzi n'abahinzi muri rusange,  uburyo buri wese aharanira kugira uruhare mu guteza imbere ubuhinzi, hagamijwe cyane cyane kuzamura umusaruro mu bwinshi no mu bwiza.

Guverineri Mugabowagahunde yasabye abahinzi kwitabira guhinga ubutaka bwose bugomba guhingwa, gukoresha inyongeramusaruro n'imbuto nziza, gufata ubwishingizi bw'ibihingwa, gukorana neza n'abafashamyumvire, kororera mu biraro no kugira ikimoteri cy'ifumbire y'imborera. Yasabye kandi abo bahinzi kwihutisha ihinga ku buryo imirimo yose yo guhinga no gutera igomba kurangirana n’ukwezi kwa Nzeri.

Iki gikorwa cyaranzwe kandi no gutanga ibikoresho by'ubuhinzi ku banyamuryango ba Koperative COVAMABA, birimo imbuto y'ibigori, inyongeramusaruro, amagare 120 ku bafashamyumvire, imiti yica udukoko mu myaka n'ibindi.

Hatanzwe kandi sheki y’amafaranga y’u Rwanda miliyoni zisaga icyenda  yo gushumbusha abahinzi bahuye n'igihombo mu gihembwe cy'ihinga gishize.

Twakwibutsa ko igishanga cya Bahimba cyatangirijwemo igihembwe cy'ihinga kuri uyu wa kane gifite ubuso bwa hegitari 327 kikaba gikora ku Mirenge itanu y'Akarere ka Rulindo., aho hegitari zigera kuri 252 ziteganyijwe guhingwaho ibigori muri iki gihemwe n'abahinzi bibumbiye muri Koperative COVAMABA.