RULINDO: GUVERINERI NYIRARUGERO YIFATANYIJE N’ABATURAGE B’UMURENGE WA KISARO MU MUGANDA RUSANGE USOZA UKWEZI KWA MATA 2022
Kuri uyu wa gatandatu tariki ya 23 Mata 2022, Guverineri w'Intara y'Amajyaruguru, Madamu Nyirarugero Dancille yifatanyije n'abaturage b'Umurenge wa Kisaro mu Karere ka Rulindo mu Muganda rusange usoza Ukwezi kwa Mata 2022. Uyu muganda wakorewe mu Kagari ka Mubuga, Umudugudu wa Rutabo wibanze ku bikorwa byo gucukura imirwanyasuri no kuyiteraho urubingo mu rwego rwo kurwanya isuri ku musozi wa Rutabo no kubunganga ikibaya cya Nyamugari kiri mu ibanga ry'uwo musozi.
| Mu butumwa yagejeje ku baturage b'Imirenge ya Kisaro na Buyoga bitabiriye umuganda usoza Ukwezi kwa Mata 2022, Guverineri w'Intara y'Amajyaruguru yabasabye gukomeza kwitabira kurwanya isuri, buri wese ahereye mu isambu ye, yitabira gutera ibiti bivangwa n'imyaka, gucukura ibyobo bifata amazi ndetse no gutera amashyamba ahashoboka hose. Yabasabye kandi kwitabira kuzirika ibisenge by'inyubako no kuva mu manegeka ku bahagituye, bakitabira gutura mu midugudu.
Ibindi Guverineri Nyirarugero yasabye abo baturage, birimo kwitabira gutanga mituweli y'umwaka 2022-2023, gushyira imbara mu isuku yo ku mubiri, aho batuye n'aho bahurira no kwirinda kurarana n'amatungo. Yasabye kandi ababyeyi kwitabira gushyira abana mu ishuri, kwirinda amakimbirane yo mu ngo no kwitabira kwiteganyiriza muri gahunda ya Ejo Heza. Abo baturage basabwe na none gukomeza kubungabunga umutekano, barushaho gukumira no kurwanya ibiyobyabwenge byiganjemo kanyanga, bikunze kugaragara muri iyi Mirenge yombi.
|
