Ku wa kabiri, tariki ya 17 Gashyantare 2026, Guverineri w’Intara y’Amajyaruguru, Mugabowagahunde Maurice yitabiriye Inteko y’Abaturage yabereye mu Kagari ka Mugote, Umurenge wa Ngoma, Akarere ka Rulindo, aho yaganiriye n’abaturage ku ngamba zo guteza imbere imibereho myiza n’iterambere rirambye.

Iyo nteko yitabiriwe kandi na ba Senateri Nyirasafari Esperance na Ngarambe Telesphore, bari mu ruzinduko rw’akazi muri ako karere, hamwe n’abayobozi b’Akarere ka Rulindo n’inzego z’umutekano.

Mu butumwa bwe, Guverineri Mugabowagahunde yagarutse ku nshingano z’abaturage mu kwita ku isuku n’isukura, kurwanya imirire mibi n’igwingira, no guhashya ubusinzi n’ibinyobwa bitujuje ubuziranenge. Yashimangiye ko imibereho myiza y’umuryango itangirira mu rugo, asaba abaturage gukomeza gufatanya mu gusubiza mu ishuri abana baritaye no gukurikirana imyigire yabo.

Yanibukije abaturage ko gusigasira ubumwe n’ubudaheranwa by’Abanyarwanda ari inkingi ya mwamba y’amahoro n’iterambere, abasaba gukomeza kwimakaza indangagaciro z’ubunyarwanda mu buzima bwa buri munsi.

Muri iyo nteko, Senateri Nyirasafari yasobanuriye abaturage uruhare rwa Sena mu kubavuganira no kurengera inyungu zabo. Yavuze ko uruzinduko rwabo rugamije gusuzuma uko abaturage bahabwa ubutabera buboneye no gukurikirana ibibazo byabo hagamijwe kubishakira ibisubizo birambye.

Inteko y’Abaturage yabaye kandi urubuga rwo kungurana ibitekerezo no kubaza ibibazo, byibanze ku byerekeye ubutaka, kurangirizwa imanza, ingurane ku bikorwa by’inyungu rusange ndetse n’ubufasha ku batishoboye. Ibibazo byose byahawe umurongo n’ibisobanuro bihagije, bishimangira imiyoborere myiza n’ubuyobozi bwegereye abaturage.