Kuri uyu wa mbere tariki ya 24 Gashyantare 2025, Minisitiri w'Ubuhinzi n'Ubworozi, Dr. Mark Cyubahiro Bagabe yakoreye uruzinduko rw'akazi mu Ntara y'Amajyaruguru, aho yasuye ibikorwa bijyanye n'iterambere ry'ubuhinzi bitadukanye mu Karere ka Musanze. Akigera ako Karere yakiriwe na Guverineri w'Intara y’Amajyaruguru, Mugabowagahunde Maurice ari kumwe n'abagize Inama y'Umutekano itaguye y'Intara, Umuyobozi w'Akarere ka Musanze n'abandi Bayobozi batandukanye.

Mu bikorwa by'ubuhinzi Minisitiri w'Ubuhinzi n'Ubworozi n'abo bari kumwe basuye muri ako Karere, birimo ubuhinzi bw'ibigori ku buso buhuje mu Gishanga cya Mukinga, aho banifatanyije n'abahinzi mu gikorwa cyo gusarura ibigori n'ibikorwa bijyanye n'ubutubuzi bw'imbuto y'ibirayi mu Kigo cy’Igihugu gishinzwe iterambere ry’ubuhinzi-RAB, Ishami rya Musanze.

Aganira n'abahinzi bibumbiye muri Koperative Twongerumusaruro- Mukinga ihinga ibigori mu Gishanga cya Mukinga, Minisitiri w'Ubuhinzi n'ubworozi yabashimiye uburyo bakorera hamwe n'umusaruro w'ibigori ufatika bafite muri iki gihemwe cy'Ihinga 2025 A. Yabasabye kwirinda abamamyi b'umusaruro w'ibigori no kuzigama amafaranga y'inyongeramusaruro, imiti n'ibindi bakenera bibafasha kongera umusaruro.

Uruzinduko rwa Minisitiri w'Ubuhinzi n'Ubworozi mu Ntara y'Amajyaruguru rwashojwe n'inama yakoranye n'Ubuyobozi bw'iyi Ntara n'Uturere tuyigize, aho barebeye hamwe uko umusaruro w'ubuhinzi, igihembwe cya 2025 A uhagaze, imyiteguro y'igihembwe cya 2025 B n'ingamba zo kongera umusaruro no kuwubungabunga.