Ibi Guverineri w’Intara y’Amajyaruguru, Madamu Nyirarugero Dancille yabisabye Abayobozi mu nzego zitandukanye mu Karere ka Musanze kuri uyu wa kane ku itariki ya 08 Mata 2021 mu nama yakoranye na bo, hagamijwe kumenyana no kuganira ku mikorere n'imikoranire ndetse n'iterambere ry'ako karere nk’Umuyobozi mushya w’Intara y’Amajyaruguru.

Mu butumwa yagejeje kuri abo Bayobozi, Guverineri Nyirarugero yabasabye gukomeza gutahiriza umugozi umwe no gushyira imbaraga mu nshingano zabo, hagamijwe kuzamura imibereho y'umuturage n'iterambere ry'Akarere kabo. Yagize ati, “Ndabasaba kandi ko mu byo mukora byose muzirikana ko umuturage ari we uza imbere, nimuharanire rero buri gihe kumuha serivisi nziza kandi muyimuhere ku gihe, mbese inyungu ze zize imbere y’ibindi byose”

Yabasabye kandi gushyira imbaraga mu mihigo y’ako karere y’umwaka wa 2020-2021 ndetse no mu mishinga y'iterambere, kubungabunga umutekano w'abaturage n'ibyabo, kunoza uburyo bwo guhanahana amakuru no kurwanya ibiyobyabwenge na magendu.

Ibindi Guverineri w'Intara y'Amajyaruguru yasabye abayobozi mu nzego zitandukanye mu Karere ka Musanze ni ugukomeza gushyira imbaraga mu kuvugurura Umujyi wa Musanze hagamijwe kuwujyanisha n'igihe, gukomeza kunoza isuku, gukangurira abaturage kwirinda ingengabitekerezo ya Jenoside, cyane cyane muri iki gihe cyo Kwibuka ku nshuro ya 27 Jenoside yakorewe Abatutsi, kurangiza ibyumba by'amashuri birimo kubakwa muri ako karere no kugenzura ko abana bose bagejeje igihe cyo kwiga bitabira ishuri, kwita ku micungire y'abakozi no gukomeza gukangurira abaturage kwirinda icyorezo cya COVID-19.

Ku ruhande rw'Ubuyobozi bw’ako karere ka Musanze, bwagejeje kuri Guverineri w’Intara y’Amajyaruguru ishusho y’ako karere, aho kageze gashyira mu bikorwa imihigo y’umwaka wa 2020-2021, imbogamizi gafite kuri imwe muri iyo mihigo ndetse bunagaragaza ahakenewe ubuvugizi kugira ngo Akarere kazashobore kwesa imihigo 2020-2021 ukwo bikwiye.

Twamenyesha ko iyi nama yitabiriwe n’abagize Komite Nyobozi y’Akarere ka Musanze, abagize Biro y’Inama Njyanama, Abayobozi b’Amashami ku karere, Abanyamabanga Nshingwabikorwa b’Imirenge 15 igize ako karere ndetse n’abahagarariye Inzego z’Umutekano zikorera muri ako karere. Muri uru ruzinduko kandi Guverineri w’Intara y’Amajyaruguru yari aherekejwe na bamwe mu bagize Inama y’Umutekano itaguye y’Intara y’Amajyaruguru