Kuri uyu wa kabiri tariki ya 12 Ukuboza 2023, mu cyumba cy'inama cy'Akarere ka Gakenke habereye umuhango w'ihererekanyabubasha hagati y'Umuyobozi mushya w'ako Karere, Madamu Mukandayisenga Vestine n'uwari Umuyobozi wako w'agateganyo, Bwana Niyonsenga Aimé François.

Uwo muhango witabiriwe na Minisitiri muri Perezidansi ya Repubulika, Hon Uwizeye Judith, Guverineri w'Intara y'Amajyaruguru, Hon Mugabowagahunde Maurice, Inzego z'umutekano zikorera muri ako karere, abagize Inama Njyanama y’ako karere n'abakozi bako kuva ku rwego rw'akarere kugera ku rwego rw'Umurenge.

Muri uwo muhango, hatanzwe ubutumwa butandukanye, buganisha ku kwifuriza Umuyobozi mushya w’Akarere ka Gakenke kuzasohoza inshingano ze uko bikwiye ndetse no kumugaragariza akazi katoroshye kamutegereje ari na ko bugaruka ku nama agomba gukurikiza kugira ngo azabashe kwesa ikivi yatangiye.

Ni muri urwo rwego Minisitiri muri Perezidansi ya Repubulika, ari na we wari Umushyitsi Mukuru muri uwou muhango yasabye Umuyobozi mushya w'Akarere ka Gakenke kubakira ku musingi asanze akarushaho guteza imbere imibereho y'abaturage b'aka Karere.

Mu byo yamusabye kuzibandaho, birimo gukemura ibibazo bigaragara muri ako Karere Karere, aho ku isonga haza ikibazo cy’imirire mibi n'igwingira mu bana bato kandi ako karere nta cyo kabuze, nk’uko byashimangiwe na Minisitiri Uwizeye, aho yagize ati, “Ntabwo byumvikana uburyo aka Karere kagira abana bari mu mirire mibi kandi nta cyo kabuze, dore ko gafite ibiribwa n’amata bihagije, icyo umuturage akeneye ni ukumuherekeza mu buryo agomba gutegura indyo yuzuye”.

Ibindi Minisitiri Uwizeye yasabye Umuyobozi mushya w’Akarere ka Gakenke kwibandaho no gushyiramo ingufu, birimo gukemura ikibazo cy'abana bata ishuri bakajya mu bucukuzi bw'amabuye y'agaciro, gukangurira abaturage gukora cyane bakivana mu bukene, kubakangurira gucika ku businzi bukabije n'ikoreshwa ry'ibiyobyabwenge, kwimakaza umuco w'imikoranire myiza n'abo bakorana, barimo Inama Njyanama, Inzego z'umutekano n'abakozi b'ingeri zitandukanye, barushaho guhana amakuru, kubahana no gushyira hamwe.

Yamusabye kandi kwirinda amatiku n'inzangano mu kazi, kwirinda amarangamutima mu byemezo afata, kwirinda abamujya mu matwi, kwirinda abamuca intege, kutarebera ikibi n'amakosa y'abakozi no kwirinda ruswa no kuyirwanya yivuye inyuma.

Ku ruhande rwe, nyuma yo kugaragariza Umuyobozi mushya w'Akarere ka Gakenke ko Akarere ajemo gasanzwe kitwara neza muri gahunda zitandukanye za Leta, Guverineri w'Intara y'Amajyaruguru yamusabye kuzashyira imbere imiyoborere myiza ishyira umuturage ku isonga, irangwa no gusubiza no gukemura ibibazo bye ku gihe no kutazatinya gufata ibyemezo bikwiye n’iyo byaba bikakaye mu gihe biri mu kuri.

Mu byo Umuyobozi mushya w'Akarere ka Gakenke yavuze azibandaho, birimo kwimakamaza imikorere myiza igamije guca akarengane, guha umuturage serivisi nziza, gukemura ibibazo by'abaturage no gushyira imbaraga mu rubyiruko.