Hagamijwe guteza imbere ireme ry'uburezi, kuri uyu wa mbere tariki ya 25 Mata 2022, mu Ntara y'Amajyaruguru hatangijwe icyumweru cyahariwe uburezi, kizibanda ku bukangurambaga bwo kugarura mu ishuri abana baritaye no gukangurira ababyeyi kugira uruhare mu gikorwa cyo kugaburira abana bose ku ishuri.

Ku rwego rw'Intara y'Amajyaruguru, iki cyumweru cy'uburezi cyatangirijwe kuri G.S Butete mu Murenge wa Cyanika mu Karere ka Burera, aho Guverineri w'iyi Ntara, Madamu Nyirarugero Dancille aherekejwe n'Ubuyobozi bw'Akarere ka Burera n'Inzego z'Umutekano, yasuye ibice bitandukanye by'icyo Kigo, anatanga ubutumwa ku banyeshuri bakigamo, ku barezi bakigishamo ndetse no ku babyeyi baharera.

Guverineri w'Intara y'Amajyaruguru yasabye abanyeshuri bose bo mu mashuri Abanza n'Ayisumbuye bo muri iyi Ntara, kwitabira kwiga neza, kwirinda gusiba no gukererwa, kurangwa n'ikinyabupfura, gusigasira ibikorwaremezo bubakiwe no kurangwa n'isuku ku mubiri no kuyigira Ibigo bigamo.

Ku ruhande rw'abarezi n'ababyeyi, Guverineri w'Intara y'Amajyaruguru arabasaba kugira uruhare rufatika mu burezi bw'abana babo no gusubiza mu ishuri abana baritaye, kugira uruhare mu gikorwa cyo kugaburira abana ku ishuri no kwimakaza isuku no kuyitoza abana babo, ikaba umuco kuri bose.