Kuri uyu wa kane, tariki ya 09 Mata 2026, mu Bitaro bya Butaro habereye igikorwa cyo Kwibuka ku nshuro ya 32 Jenoside yakorewe Abatutsi. Ni igikorwa cyitabiriwe n’abayobozi batandukanye barimo Guverineri w’Intara y’Amajyaruguru, Mugabowagahunde Maurice, Umuyobozi w’Inkeragutabara mu Ntara, Lt Col Kamali Charles, Umuyobozi Wungirije wa Polisi mu Ntara, CSP Prudence Ngendahimana, Umuyobozi w’Akarere ka Burera, Mukamana Soline  ndetse n’abandi bayobozi mu nzego zitandukanye.

Mu kiganiro cyatanzwe na Guverineri w’Intara y’Amajyaruguru, hibanzwe ku mateka ya Jenoside yakorewe Abatutsi, by’umwihariko agaruka ku ruhare rwagaragaye mu nzego z’ubuzima, zirimo ibitaro n’ibigo nderabuzima.

Yagaragaje ko mu gihe cya Jenoside, hari bamwe mu bayobozi n’abakozi bo muri izi nzego bagize uruhare rubabaje, aho bishe bagenzi babo, abarwayi ndetse n’abarwaza. Yashimangiye ko ayo mateka akwiye kubera isomo rikomeye abakora mu rwego rw’ubuzima, abasaba kuba umusemburo w’impinduka nziza no guharanira ko ibyabaye bitazongera ukundi.

Guverineri Mugabowagahunde yasabye abaganga n’abaforomo bo mu Bitaro bya Butaro kurushaho kwigira ku mateka ya Jenoside yakorewe Abatutsi, bakarwanya ingengabitekerezo y’urwango aho iva ikagera, bakimakaza ubumwe n’ubudaheranwa bw’Abanyarwanda, ndetse bagakomeza kuzuza inshingano zabo zo kurengera ubuzima bw’ababagana, batanga serivisi zinoze kandi zishingiye ku ndangagaciro z’ubunyamwuga bwabo.

Ku ruhande rwe, Umuyobozi w’Inkeragutabara mu Ntara y’Amajyaruguru, Lt Col Kamali Charles, yagarutse ku rugamba rwo kubohora Igihugu no guhagarika Jenoside, asaba abitabiriye iki gikorwa gukomeza kugira uruhare rugaragara mu kubungabunga umutekano no guharanira ko Jenoside itazongera kubaho ukundi.

Iki gikorwa cyabereye mu Bitaro bya Butaro kiri mu murongo w’ibikorwa byo Kwibuka ku nshuro ya 32 Jenoside yakorewe Abatutsi, bigamije kuzirikana amateka, guha icyubahiro abazize Jenoside no gukomeza kubaka u Rwanda ruzira ivangura n’urwango.