Kuri uyu wa gatatu, tariki ya 18 Gashyantare 2026, Guverineri w’Intara y’Amajyaruguru, Mugabowagahunde Maurice, yakiriye itsinda ry’abasirikare bakuru bo mu ngabo z’Igihugu cya Uganda (UPDF) bayobowe na Maj. Gen. Paul Muhanguzi, bari mu ruzinduko rw’akazi mu Rwanda.

Ibiganiro byahuje impande zombi byibanze ku gushimangira ubufatanye mu nzego zitandukanye zirimo guteza imbere ubukerarugendo, inganda no koroshya ubucuruzi bwambukiranya imipaka. Ibyo byose bigamije iterambere rirambye n’imibereho myiza y’abaturage b’ibihugu byombi.

Guverineri Mugabowagahunde yashimangiye ko ibiganiro bagiranye na bagenzi babo bo muri Uganda ari umusingi ukomeye wo kurushaho kwimakaza ubufatanye burambye. Yagaragaje ko aya mahirwe atuma bungurana ibitekerezo byubaka, bagasangira ubunararibonye, ndetse bakananoza imikoranire mu bikorwa bigamije gushimangira umutekano no guteza imbere imibereho myiza y’abaturage.

Uru ruzinduko rwitabiriwe n’abayobozi b’Ingabo mu Ntara y’Amajyaruguru n’iy’Iburasirazuba, abayobozi mu nzego z’umutekano, ndetse n’abayobozi b’Uturere twa Musanze, Gicumbi na Burera duhana imbibi na Uganda.

Nyuma y’ibiganiro, itsinda ryasuye inganda zirimo Gorilla Textile Ltd ikora imyenda na CIMERWA ikora sima, zombi ziherereye mu Cyanya cy’Inganda cya Musanze. Iki gikorwa cyari kigamije kureba imikorere y’izi nganda, gusangira ubunararibonye no kurebera hamwe amahirwe y’ubufatanye mu guteza imbere urwego rw’inganda.

Uru ruzinduko rugaragaza ubushake bw’ibihugu byombi bwo gukomeza gukorana bya hafi mu kubungabunga umutekano, guteza imbere ubufatanye mu by’ubukungu no kwimakaza iterambere rirambye mu karere.