Ibi ni ibikubiye mu butumwa Madamu Yankurije Odette, Umuvunyi Wungirije ushinzwe gukumira no kurwanya akarengane, yagejeje ku bitabiriye ibiganiro byateguwe n’Urwego rw’Umuvunyi bigenewe abagize Inama Ngishwanama zo gukumira no kurwanya akarengane na ruswa mu Turere tugize Intara y'Amajyaruguru. Ibi biganiro byabereye i Musanze kuri uyu wa kane tariki ya 2 Ugushyingo 2021, byateguwe mu rwego rw'icyumweru cyahariwe kurwanya ruswa, kibanziriza kwizihiza Umunsi Mpuzamahanga wo kurwanya ruswa, uzizihizwa ku itariki ya 09 Ukuboza 2021, hazirikanwa insanganyamatsiko igira iti, "Kurandura ruswa, inkingi y'iterambere rirambye".

Ibi biganiro byitabiriwe n'Abayobozi batandukanye, barimo Guverineri w'Intara y'Amajyaruguru, Madamu Nyirarugero Dancille, Umuvunyi Wungirije ushinzwe gukumira no kurwanya akarengane, Madamu Yankurije Odette, Depite Niyorurema Jean René, wari uhagarariye Ihuriro ry'Inteko Nyafurika zishinga Amategeko, rishinzwe kurwanya ruswa, Komiseri muri Komisiyo y'Igihugu y'Uburenganzira bwa Muntu, Madamu Gahongayire Aurélie, Inzego z'Umutekano ku rwego rw'Intara, Abayobozi b'Uturere tugize Intara y'Amajyaruguru ndetse n'abagize Inama Ngishwanama zo gukumira no kurwanya akarengane na ruswa mu turere tugize iyi Ntara.

Mu butumwa yagejeje ku bitabiriye ibi biganiro, Umuvunyi Wungirije yavuze ko Leta yashyizeho amategeko ndetse ifata n’ingamba zikomeye zo kurwanya ruswa, ko ariko  urugamba rwo kuyirwanya rugikomeje kubera ko ruswa itaracika buundu. Yongeyeho ko mu rugamba rwo gukomeza gukumira no kurwanya ruswa n’akarengane, hashyizweho Inama Ngishwanama zo gukumira no kurwanya ruswa n’akarengane ku nzego zitandukanye, ku rwego rw’Igihugu, ku rwego rw’Akarere ndetse no ku rwego rw’Umurenge n’Akagari.

Agaruka ku Nama Ngishwanama yo ku rwego rw’Akarere, Umuvunyi Wungirije yavuze ko zimwe mu inshingano ifite, harimo gushyiraho ingamba zo kurwanya ruswa n’akarengane mu Karere, gusesengura no kugira icyo ivuga ku nyandiko zakozwe kuri ruswa n’akarengane ku rwego rw’Akarere no gushyiraho uburyo bwo guhana amakuru hagati y’inzego zishinzwe kurwanya ruswa n’akarengane ku rwego rw’Akarere. Umuvunyi Wungirije akaba yashimangiye ko urugamba rwo kurwanya ruswa rusaba uruhare rwa buri wese ko kandi Inama Ngishwanama zo gukumira no kurwanya ruswa nizishyira imbaraga mu gutanga amakuru ku karengane na ruswa nta kabuza bizacika bikaba amateka mu gihigu cyacu.

Ku ruhande rwe, Guverineri w’Intara y’Amajyaruguru wari Umushyitsi Mukuru muri ibi biganiro, yavuze ko iterambere Igihugu cyifuza ridashobora kugerwaho mu gihe hari ahakigaragara akarengane na ruswa. Ni muri urwo rwego yasabye Abayobozi bo mu Ntara y’Amajyaruguru, kurinda abaturage bayobora akarengane, kwirinda kubasiragiza igihe babakeneyeho serivisi no kwirinda kubashora mu bikorwa ibyo ari byo byose bya ruswa, kuko nk’uko yabishimangiye,“ Leta itazihanganira na gato umuntu wese wijandika mu bikorwa bya ruswa”.

Twabamenyesha ko mu gusoza ibi biganirio, Inama Ngishwanama yo gukumira no kurwanya akarengane na ruswa y'Akarere ka Rulindo yahize izindi mu Ntara y'Amajyaruguru mu marushanwa yateguwe n'Urwego rw'Umuvunyi y'uyu mwaka 2021, yashyikirijwe Icyemezo (certificate) cy'Ishimwe n'Igikombe.