Ku gicamunsi cyo kuri uyu wa kane tariki ya 03 Ukwakira 2024, Guverineri w'Intara y'Amajyaruguru, Hon. Mugabowagahunde Maurice ari kumwe n'Umuyobozi w'Akarere ka Gakenke, Madamu Mukandayisenga Vestine, basuye Urugomero rw'Amashanyarazi rwa Nyabarongo II, hagamijwe kureba aho imirimo yo kurwubaka igeze n'ibibazo bihari bikeneye gukorerwa ubuvugizi.

Uru Rugomero rwa Nyabarongo II ruri kubakwa hagati y'Uturere twa Gakenke na Rulindo tw'Intara y'Amajyaruguru n'Akarere ka Kamonyi k'Intara y'Amajyepfo, rukaba rwubakwa na Sosiyete y'Abashinwa yitwa Sino Hydro Corporation. Imirimo yo kurwubaka yatangiye mu mwaka wa 2022 aho biteganyijwe ko izarangira muri 2026, rukazatanga amashanyarazi angana na Megawati 43.5.

Mu gusura uru Rugomero, Guverineri w'Intara y'Amajyaruguru n'abo bari kumwe, basobanuriwe ibice bigize uyu mushinga n'ibikorwa bimaze gukorwa ndetse banasura ibice bitandukanye by'uyu mushinga bareba aho ibikorwa bigeze.