Ibi ni ibyatangajwe kuri uyu wa gatatu tariki ya 15 Ukuboza 2021 mu nama ngarukamwaka y'Ihuriro ry'Abafatanyabikorwa mu iterambere bazwi ku izina rya “JADF” ku rwego rw'Intara y'Amajyaruguru, yateguwe ku bufatanye bw'Urwego rw'Igihugu rw'Imiyoborere- RGB n’Intara y'Amajyaruguru. Iyi nama yabereye mu Karere ka Musanze, yayobowe na Guverineri w'Intara y'Amajyaruguru, Madamu Nyirarugero Dancille afatanyije n'Umuyobozi Mukuru wa RGB, Dr Usta Kaitesi, ikaba yitabiriwe n’abayobozi mu nzego zitandukanye za Leta, iz’umutekano, abahagarariye Urugaga rw’Abikorera ndetse n’abahagarariye amadini n’amatorero akorera muri iyi Ntara.

Iyi nama yari igamije kurebera hamwe uburyo bwo kurushaho kunoza imikorere n'imikoranire y'Abafatanyabikorwa mu iterambere mu Turere tugize Intara y'Amajyaruguru n'ingamba zo kurushaho gukorera hamwe mu gutegura igenamigambi no guhuza ubushobozi mu rwego rwo kunoza serivisi zihabwa abaturage, ari bo bagenerwabikorwa.

Nk'uko byagaragajwe n’Urwego rw’Igihugu rw’Imiyoborere, Abafatanyabikorwa mu iterambere mu Ntara y'Amajyaruguru bagira uruhare rukomeye mu bikorwa bitandukanye bigamije imibereho myiza y’abaturage, birimo ubuhinzi, ubworozi, uburezi, ubuzima n’ibindi, aho muri rusange muri uyu mwaka dusoza wa 2021, ibikorwa byakozwe bifite agaciro k'amafaranga y'u Rwanda asaga miliyari cumi n'umunani.

Umuyobozi Mukuru w’Urwego rw’Imiyoborere, Dr Usta Kaitesi, yavuze ko n’ubwo abafatanyabikorwa mu iterambere bagira uruhare mu bikorwa bitandukanye bigamije kuzamura imiberereho y’abaturage, bakwiye kongera imbaraga mu kuzamura imyumvire y’abaturage, kuko iyo myumvire niba iri hejuru nta kabuza izazamura igipimo cy’imibereho yabo. Yabasabye kandi kurushaho gufatanya n’Ubuyobozi bw’inzego z’ibanze kureba ibikorwa byihutirwa bikenewe ndetse no kugena aho bigomba gukorerwa, hagamijwe kurushaho kugira uruhare mu gukemura ibibazo bitandukanye bibangamiye imibereho myiza y’abaturage.

Guverineri w'Intara y'Amajyaruguru, Nyirarugero Dancille yasabye abafatanyabikorwa mu iterambere bo muri iyi Ntara, kurushaho kugira uruhare mu gukemura ibibazo biyigaragaramo, birimo igwingira ry'abana, abana bata ishuri, isuku nke igaragara hirya no hino muri iyi Ntara ndetse no kurushaho kugira uruhare mu guhangana no guhashya icyorezo cya COVID-19.

Ku ruhande rwabo, abafatanyabikorwa mu iterambere mu Ntara y’Amajyaruguru, bijeje ubuyobozi bw’iyi Ntara ko bagiye kurushaho gufatanya n’inzego za Leta, hagamijwe gutahiriza umugozi umwe no gushakira hamwe ibisubizo by’ibibazo bibangamiye imibereho myiza y’abayituye.