Kuri iki cyumweru tariki ya 15 Ukwakira 2023, u Rwanda rwifatanyije n’Isi yose mu kwizihiza Umunsi Mpuzamahanga w’Umugore wo mu cyaro, hazirikanwa insanganyamatsiko igira iti, “Dushyigikire iterambere ry'umugore wo mu cyaro”. Ibirori byo kwizihiriza uyu munsi ku rwego rw’Igihugu, byabereye mu Murenge wa Rubaya mu Karere ka Gicumbi.

Ni ibirori byitabiriwe na Minisitiri w’Uburinganire n’Iterambere ry’Umuryango, Dr. Uwamariya Valentine, ari na we wari Umushyitsi Mukuru, Guverineri w’Intara y'Amajyaruguru, Bwana MugabowagahundeMaurice, Abadepite mu Nteko ishinga Amategeko, Abayobozi mu nzego zitandukanye z’Igihugu, abahagarariye Imiryango Mpuzamahanga ikorera mu Rwanda, Inzego z’Umutekano n’abaturage bo mu Murenge wa Rubaya.

Mu ijambo rye, Minisitiri Uwamariya yashimye uruhare umugore wo mu cyaro afite mu guteza imbere Igihugu, binyuze mu bikorwa bitandukanye biteza imbere ubukungu, birimo iby’ubuhinzi, ubworozi, ubukorikori n’ibindi.

Minisitiri Uwamariya yasabye umugore wo mu cyaro kubyaza umusaruro amahirwe yamushyiriweho ajyanye no kumworohereza kubona inguzanyo mu mabanki n’ibigo by’imari, kwitabira ubuhinzi bukoresha ikoranabuhanga, bugamije kwihaza mu biribwa no gusagurira amasoko, kugira uruhare mu kurwanya amakimbirane, ubusinzi, igwingira, ihohoterwa iryo ari ryo ryose rikorerwa mu muryango no kujyana mu ishuri abana bose bagejeje igihe cyo kwiga.

Minisitiri Uwamariya yasabye kandi abagabo kwitabira gufatanya n’abagore mu iterambere no kwizera abagore ko bashoboye gukora imirimo yose, cyane cyane imirimo ibyara inyungu.

Ku ruhande rwe, Guverineri w’Intara y’Amajyaruguru yavuze ko kwizihiza Umunsi Mpuzamahanga w'Umugore wo mu cyaro ari ukuzirikana aho umugore wo mu cyaro yavuye n’aho ageze mu iterambere ndetse no kureba ibibazo agihura na zo, hagamijwe kubikemura.

Ibirori byo kwizihiza Umunsi Mpuzamahanga w’Umugore wo mu Cyaro, byaranzwe kandi no kuremera inka imiryango ibiri itishoboye, gutanga sheki y’u Rwanda miliyoni itanu ku matsinda makumyabiri y’abagore, gutanga ibigega bifata amazi ku miryango magana abiri, gutanga amashyiga ya kijyambere ku miryango ijana na mirongo itatu n’itanu, kuremera imiryango itishoboye mirongo itanu inkoko zo korora n'ibindi.