Kuri uyu wa kabiri tariki 18 Ukwakira 2022, mu Karere ka Burera hatangirijwe icyumweru cyahariwe ibikorwa by’uburezi ku rwego rw’Intara y’Amajyaruguru. Iki cyumweru cyatangirijwe ku Ishuri ryisumbuye rya Kagogo riherereye mu Murenge wa Kagogo mu Karere ka Burera, gitangizwa na Guverineri w'Intara y'Amajyaruguru, Nyirarugero Dancille ari kumwe n'Umuyobozi Mukuru w'Ikigo cy'Igihugu gishinzwe guteza imbere Imyuga, Tekiniki n'Ubumenyingiro, Umukunzi Paul. Iki gikorwa cyitabiriwe kandi n'Umuyobozi wa Polisi mu Ntara y'Amajyaruguru, CSP Francis Muheto, Inzego z'Umutekano n'Ubuyobozi bw'Akarere ka Burera.

Nk’uko byasobanuwe na Guverineri Nyirarugero, ibikorwa bizibandwaho muri iki cyumweru, birimo kugenzura uko amabwiriza yashyizweho na Minisiteri y'Uburezi ajyanye n'amafaranga y'ishuri yishyurwa n’ababyeyi ashyirwa mu bikorwa, kureba uburyo gahunda yo gufatira amafunguro ku ishuri ku banyeshuri bose yubahirizwa, kureba uko ibigo by'amashuri bicunzwe muri rusange ndetse no kureba uko abanyeshuri bitabiriye itangira ry’amashuri mu mwaka w’amashuri 2022-2023.

Guverineri Nyirarugero yavuze ko iki cyumweru cyitezweho ibisubizo ku bibazo bikigaragara mu bigo by’amashuri, aho yagize ati, “Iyi gahunda tuyitezeho umusaruro ushimishije, cyane ko ari igikorwa kizaba gihuriweho n’inzego zose kugeza ku zegereye abaturage mu masibo, bakazajya basura urugo ku rundi, bakangurira ababyeyi kumva uruhare rwabo mu guha abana ibikenewe, bagasubizwa mu ishuri. Ikindi ni uko n’ibigo by’amashuri bizahabwa umurongo wo kunoza imicungire yabyo, cyane cyane bikosora ibitagenda neza”.

Mu butumwa yagejeje ku banyeshuri bo mu Ishuri ryisumbuye rya Kagogo, Guverineri Nyirarugero yababwiye ko Leta y’u Rwanda ibakunda kandi ikora ibishoboka byose ngo bige neza kandi bafite intego, bityo bazigirire akamaro banakagirire Igihugu.

Agaruka ku banyeshuri bataritabira ishuri, Guverineri Nyirarugero yasabye abiga mu Ishuri ryisumbuye rya Kagogo, kugira uruhare mu gushishikariza abo bagenzi babo kwihutira kuryitabira. Yagize ati, “Aho muzi umwana utaritabira ishuri, mutange amakuru, dufatanye twese kugira ngo yihutire kujya mu ishuri”.

Mu bindi Guverineri w’Intara y’Amajyaruguru yasabye abo banyeshuri, birimo kurangwa n’imyitwarire myiza no kwimakaza umuco w’isuku, cyane cyane isuku yo ku mubiri, ku myambaro no ku nyubako n’ibikoresho by’ishuri.

Guverineri w’Intara y’Amajyaruguru yagarutse kandi ku barezi, aho yabasabye gukorana umurava no gukomeza guharanira kuzamura ireme ry'uburezi.

Iki gikorwa cyo gusura Ibigo by’Amashuri kigamije ubugenzuzi buzibanda ku ngingo zavuzwe haruguru, kirakorwa ku bufatanye bw’Inzego zitandukanye, zirimo Minisiteri y’Ubutegetsi bw’Igihugu, Ikigo cy'Igihugu gishinzwe Ibizamini n'Ubugenzuzi bw'Amashuri (NESA), Intara y’Amajyaruguru n’Ubuyobozi bw’Inzego z’Ibanze.