Nk’uko byagenze hirya no hino mu Gihugu cyose no ku Isi muri rusange, kuri uyu wa mbere, tariki ya 07 Mata 2025, hatangijwe icyumweru cy’icyunamo cyo kwibuka ku nshuro ya 31 Jenoside yakorewe Abatutsi mu Rwanda mu 1994.

Ni muri urwo rwego Abayobozi n'abakozi b'Intara y’Amajyaruguru barangajwe imbere na Guverineri wayo Mugabowagahunde Maurice, bifatanyije n'Akarere ka Rulindo mu gikorwa cyo gutangiza icyumweru cy'icyunamo cyo kwibuka ku nshuro ya 31 Jenoside yakorewe Abatutsi, igikorwa cyabereye ku Rwibutso rwa Jenoside yakorewe Abatutsi rwa Mbogo.

Mu butumwa bwe, Guverineri Mugabowagahunde Maurice, ari na we wari Umushyitsi Mukuru, yihanganishije abarokotse Jenoside yakorewe Abatutsi anabashimira ko bataheranwe n'agahinda ahubwo bakomeje urugamba rwo kwiyubaka no kwiteza imbere.

Yashimiye Ubuyobozi bwiza bw'u Rwanda bwita ku mibereho y'abarokotse Jenoside n'Ingabo zahoze ari iza FPR Inkotanyi zahagaritse Jenoside yakorerwaga Abatutsi.

Yasabye abaturage bafite amakuru y'ahari imibiri itarashyingurwa kuyatanga kugira ngo ishyingurwe mu cyubahiro ndetse anabasaba kurangwa n'imyitwarire myiza muri iki gihe cyo kwibuka ku nshuro ya 31 Jenoside yakorewe Abatutsi, kwirinda ingengabitekerezo ya Jenoside, kuba hafi abarokotse Jenoside yakorewe Abatutsi no kuzitabira gahunda zose zo kwibuka ziteganyijwe mu gihe cy'iminsi ijana.

Perezida wa IBUKA mu Karere ka Rulindo, Murebwayire Alphonsine, yagaragaje uburyo Abatutsi bo muri ako gace k'iyahoze ari Komini Mbogo batotejwe ndetse bakicwa mu myaka yabanjirije Jenoside yakorewe Abatutsi mu Rwanda mu 1994.

Yashimiye Nyakubahwa Perezida wa Repubulika Paul Kagame n'Ingabo zahoze ari iza RPA kuba zararokoye bamwe mu Batutsi bicwagwa no kuba ubu barasubije ubuzima. 

Yashimiye kandi Ubuyobozi muri rusange bubahora hafi mu rugendo rwo kwiyubaka no kwiteza imbere.

Mu buhamya bwe, Dukuzimana Théodore warokotse Jenoside, yagaragaje inzira itoroshye yanyuzemo mu gihe cya Jenoside yakorewe Abatutsi n'uburyo nyuma yo kuyirokoka ataheranywe n'agahinda ahubwo yatangiye kandi akomeje urugamba rwo kwiyubaka no kwiteza imbere.

Abitabiriye iki gikorwa bagejejweho kandi ikiganiro kijyanye no kwibuka Jenoside yakorewe Abatutsi, cyatanzwe na Depite Bitunguramye Diogène.

Twabamenyesha ko gutangiza ibikorwa byo kwibuka ku nshuro ya 31 Jenoside yakorewe Abatutsi mu Rwanda mu Karere ka Rulindo byabimburiwe n'igikorwa cyo kwenyegeza Urumuri rw'icyizere cyabereye ku Biro by'Umurenge wa Rusiga no kunamira no guha icyubahiro imibiri ishyinguye mu Rwibutso rwa Jenoside yakorewe Abatutsi rwa Mbogo.