Kuri uyu wa kabiri tariki ya 10 Gashyantare 2026, Guverineri w’Intara y’Amajyaruguru, Hon Mugabowagahunde Maurice yasuye Intore z’Inkomezabigwi icyiciro cya 13 ziri ku Rugerero mu Murenge wa Rugarama, mu Karere ka Burera, aho yifatanyije na zo mu bikorwa by’iterambere bigamije guteza imbere imibereho, birimo kuvugurura Ibiro by'Akagari ka Cyahi.

Uru ruzinduko rwabaye mu gihe izi Ntore zikomeje ibikorwa by'Urugerero rudaciye ingando, gahunda igamije gutoza urubyiruko indangagaciro z’ubunyarwanda, gukunda igihugu, kwitangira gukorera umuryango nyarwanda no kugira uruhare rufatika mu iterambere ry’igihugu.

Muri uru ruzinduko, Guverineri Mugabowagahunde yifatanyije n’Intore mu bikorwa bitandukanye by’umuganda, birimo kuvugurura Ibiro by’Akagari ka Cyahi, igikorwa kigamije kunoza serivisi zitangwa ku baturage no guteza imbere imiyoborere myiza ishingiye ku bufatanye bw’abayobozi n’abaturage ndetse no gutera ibiti by'imbuto mu rwego rwo kurwanya imirire mibi n'igwingira.

Aganiriza Intore z’Inkomezabigwi, Guverineri w’Intara y’Amajyaruguru yashimye umuhate n’ubwitange bigaragazwa n’uru rubyiruko, agaragaza ko Urugerero ari ishuri rikomeye ryubaka urubyiruko rufite indangagaciro, rwubaha umurimo kandi rwiteguye kwitangira igihugu.
Yagize ati: “Urugerero ni umusingi wo kubaka urubyiruko rufite indangagaciro n’ubushobozi bwo kugira uruhare mu iterambere ry’igihugu. Ibyo mukora uyu munsi ni isomo rikomeye ribategurira ejo hazaza heza n’igihugu gikomeye.”

Guverineri Mugabowagahunde yibukije izi Ntore ko ubumenyi n’indangagaciro bigaragarira mu bikorwa bifatika bigira umumaro ku baturage, abasaba gukomeza kuba icyitegererezo cy’urubyiruko aho bazaba hose, bagaharanira iterambere n’imibereho myiza y’abaturage.

Guverineri w'Intara y'Amajyaruguru yasabye kandi izi Ntore kurwanya ubusinzi, guharanira isuku ahantu hose, kugira uruhare mu gusubiza mu ishuri abana baritaye no kugira uruhare mu gukemura ibibazo bibangamiye imibereho myiza y'abaturage.

Ku ruhande rw’Intore z’Inkomezabigwi, zagaragaje ko zishimiye uru ruzinduko rwa Guverineri, zemeza ko rubahaye imbaraga zo gukomeza kwitanga no gukorera hamwe. Bavuze kandi ko Urugerero rubafasha kwiyubaka mu mitekerereze no mu myitwarire, bakanarushaho gusobanukirwa inshingano zabo nk’urubyiruko rufite aho ruhuriye n’ejo hazaza h’igihugu.