Ibi Guverineri w’Intara y’Amajyaruguru, Mugabowagunde Maurice yabisabye Urubyiruko rw’Abakorerabushake kuri uyu wa kane tariki ya 31 Ukwakira 2024 mu gikorwa cyo gusoza ukwezi kwahariwe ibikorwa by’Urubyiruko rw’Abakorerabusahake. Ku rwego rw’Igihugu iki gikorwa cyabereye mu Murenge wa Kaniga mu Karere ka Gicumbi, cyitabirwa n’abayobozi mu nzego zitandukanye, urubyiruko rw’abakorerabushake n’abaturage.

Mu butumwa bwe, Guverineri Mugabowagahunde wari uhagarariye Minisitiri w’Ubutegetsi bw’Igihugu muri iki gikorwa yashimiye Urubyiruko rw'Abakorerabushake ku ruhare runini rugira mu iterambere ry'Igihugu, mu kubungabunga umutekano no mu mibereho myiza y'abaturage.

Mu bikorwa Urubyiruko rw'Abakorerabushake rugiramo uruhare, Guverineri Mugabowagahunde yagarutseho, birimo kubakira abatishoboye amacumbi, kubaka ibikorwaremezo bitandukanye, gukumira indwara z'ibyorezo, kurwanya ibiyobyabwenge no gukumira abambuka umupaka mu buryo bunyuranyije n’amategeko, gukumira ibyaha, gukangurira abaturage gahunda zitandukanye za Leta, zirimo kwiteganyiriza muri gahunda ya Ejo Heza, kwishyura mituweli, guhuza ubutaka no kubuhingaho ibihingwa byatoranyijwe n'ibindi.

Mu byo Guverineri Mugabowagahunde yasabye uru rubyiruko, birimo gukomeza gukangurira abaturage kwita ku isuku, gukemura amakimbirane yo mu miryango, kurwanya imirire mibi mu bana, gusubiza abana mu ishuri baritaye, guharanira ubumwe n'ubudaheranwa by'Abanyarwanda, kunyomoza abaharabika u Rwanda bakoresheje imbuga nkoranyambaga, gukumira icyaha kitaraba, kwitabira irondo, kwitwara neza muri byose no gufasha abaturage guhindura imyumvire. Aha ni naho yahereye asaba uru rubyiruko kutazigera na rimwe rudohoka mu bikorwa bishyira umuturage ku isonga, cyane cyane ibigamije kuzamura imibereho ye ikarushaho kuba myiza. Yijeje kandi uru rubyiruko ko inzego z’ibanze ziteguye gukomeza kuruba hafi no kurushyigikira mu bikorwa byose by’ubukorerabushake rukora.

Igikorwa cyo gusoza Ukwezi kwahariwe ibikorwa by'Urubyiruko rw'Abakorerabushake cyaranzwe n'umuganda wo gutera ibiti bivangwa n'imyaka mu Kagari ka Bugomba mu Murenge wa Kaniga, ahatewe ibiti bigera ku bihumbi icumi, kuremera imiryango itatu itishoboye, aho yahawe inka ndetse no gusura Ingoro y'Amateka y'Urugamba rwo kubohora Igihugu iherereye ku Mulindi w'Intwari.