Ibi Guverineri w’Intara y’Amajyaruguru yabisabye urubyiruko rwo mu Karere ka Gakenke kuri uyu wa gatatu tariki ya 13 Kanama 2025 mu birori byo kwizihiza Umunsi Mpuzamahanga w'Urubyiruko, byabereye mu Murenge wa Rushashi ku nsanganyamatsiko igira iti,”Kubaka ubushobozi bw'urubyiruko hagamijwe iterambere rirambye”. 

Mu ijambo yagejeje ku rubyiruko rwitabiriye ibyo birori, Guverineri Mugabowagahunde yarushimiye uruhare rugira mu bikorwa bigamije guteza iterambere Akarere kabo n'Igihugu muri rusange. Yashimangiye ko rugira uruhare rukomeye mu bikorwa bigamije gukemura ibibazo bibangamiye imibereho myiza y’abaturage, birimo kubaka amazu n’ubwiherero bigenewe imiryango itishoboye, kurwanya imirire mibi n’igwingira mu bana, ibikorwa by’isuku, gusubiza abana mu ishuri n’ibindi.

Agaruka ku myitwarire y’urubyiruko, Guverineri w’Intara yasabye urwo rubyiruko kurangwa n'imyitwarire myiza no kwirinda ibishuko bishobora kurutesha agaciro no kwangiza ejo hazaza harwo, birimo ibiyobyabwenge, ubusinzi, inda zitateganyijwe n’uburangare mu gukoresha ikoranabuhanga. 

Ibindi Guverineri w’Intara y’Amajyaruguru yasabye urwo rubyiruko, birimo gukomeza kwitabira ibikorwa bituma Akarere kabo gahora ku isonga muri gahunda zitandukanye, zirimo mituweli, Ejo Heza n’imitangire ya serivisi nziza. Yarusabye kandi kurushaho kwitabira ibikorwa by'imikino no kwitegura kuzagaragara mu mikino y'Amarushanwa Umurenge Kagame Cup 2025-2026 kuko umwaka ushize rutitwaye neza.

Yarusabye na none gutinyuka kuko byose bishoboka, kugira uruhare mu miyoborere y'Igihugu, rurushaho kwitabira gahunda ziba zateganyijwe, zirimo ibiganiro, umuganda, amatora n'ibindi.

Guverineri w'Intara y'Amajyaruguru yasabye kandi Abayobozi n'ababyeyi kuba hafi urubyiruko no kurufasha kugira imyitwarire iboneye no kurushishikariza kubyaza umusaruro amahirwe Igihugu cyarushyiriyeho.

Twabamenyesha ko mu Karere ka Gakenke urubyiruko rugizwe na 30.2% by'abaturage b'ako Karere kandi rugira uruhare rukomeye mu bikorwa biteza imbere ubukungu n'imibereho y'abagatuye, nk’uko byatangajwe n’Umuyobozi wako, Mukandayisenga Vestine.

Mu kwizihiza Umunsi Mpuzamahanga w’Urubyiruko 2025, urubyiruko rwo mu Karere ka Gakenke rwagaragarije abitabiriye ibyo birori imishinga itandukanye rukora, irimo iy’ubuhinzi n’ubworozi no kongerera agaciro umusaruro ubikomokaho, gukora ibikoresho by’ubwubatsi, ikoranabuhanga n’indi.