Kuri uyu wa kane, tariki ya 26 Werurwe 2026, mu Karere ka Gicumbi habereye Ihuriro ry’Ishoramari ryari rigamije kugaragaza amahirwe y’ishoramari ari muri aka karere no gushishikariza abashoramari kuyabyaza umusaruro, hagamijwe guteza imbere ubukungu burambye.

Iri huriro ryateguwe n’Akarere ka Gicumbi ku bufatanye n’Urwego rw’Igihugu rw’Iterambere (RDB), ryitabiriwe n’abayobozi batandukanye barimo Minisitiri w’Ikoranabuhanga na Inovasiyo, Ingabire Paula; Guverineri w’Intara y’Amajyaruguru, Mugabowagahunde Maurice; Umuyobozi ushinzwe Ishoramari muri RDB, Umurungi Michelle, ndetse n’abandi bayobozi mu nzego zitandukanye ndetse n’abashoramari baturutse batandukanye.

Muri iri huriro, hagaragajwe amahirwe menshi y’ishoramari, by’umwihariko mu nzego zirimo ubukerarugendo, ubuhinzi n’ubworozi, uburezi, ubuzima, kubungabunga ibidukikije ndetse n’ubucuruzi bugezweho. Aya mahirwe agaragaza ubushobozi bw’Akarere ka Gicumbi mu gukurura ishoramari rifite inyungu z’igihe kirekire.

Mu ijambo rye, Minisitiri Ingabire Paula yagaragaje ko Akarere ka Gicumbi gafite amahirwe yihariye atuma gashobora gukurura abashoramari benshi, ashingiye ku kuba kegereye Umujyi wa Kigali no kuba gahana imbibi n’Igihugu cya Uganda. Yavuze ko ibi ari bimwe mu byatuma ibikorwa by’ishoramari byahashyirwa bifite amahirwe menshi yo kunguka.

Mu gusoza Ihuriro ry’Ishoramari ry'Akarere ka Gicumbi, Guverineri w'Intara y'Amajyaruguru yashimiye Akarere na RDB uburyo bariteguye neza. Yashishikarije abashoramari kubyaza umusaruro amahirwe bagaragarijwe, birinda gukora ku giti cyabo, ahubwo bagafatanya mu mishinga minini itanga inyungu zirambye.

Abashoramari bitabiriye iri huriro na bo bagaragaje ubushake bwo guhita batangira kubyaza umusaruro amahirwe bagaragarijwe, bishimangira icyizere cy’uko iri huriro rigiye kugira uruhare rufatika mu guteza imbere ishoramari mu Karere ka Gicumbi.