Kuri uyu wa gatandatu tariki ya 25 Ukwakira 2025, Minisitiri w'Uburinganire n'Iterambere ry'Umuryango, Hon. Uwimana Consolée ari kumwe na Guverineri w'Intara y'Amajyaruguru, Hon Mugabowagahunde Maurice, Umuyobozi w'Akarere ka Gakenke, Madamu Mukandayisenga Vestine n'abahagarariye Inzego z'Umutekano ku rwego rw'Intara n'Akarere ka Gakenke, bifatanyije n'abaturage b'Akarere ka Gakenke, Umurenge wa Mugunga, Akagari ka Rwamambe bagera kuri 560 mu muganda rusange usoza Ukwezi k'Ukwakira 2025, umuganda wibanze ku gikorwa cyo gutera igiti. 
Iki gikorwa cyakorewe mu gishanga cya Nyarutovu gihinzemo ibigori kuri ha 36, hakaba hatewe ibiti  bivangwa n'imyaka  3,276 by'amoko atandukanye, gereviriya, imisave n'ibindi.

Ubutumwa Minisitiri w'Uburinganire n'Iterambere ry'Umuryango yagejeje ku bitabiriye uyu muganda, abicishije mu kiganiro yagiranye na bamwe muri bo, yabasabye kurwanya ibibangamiye umuryango, birimo inda ziterwa abana b'abakobwa, igwingira n'imirire mibi mu bana, amakimbirane mu muryango, abana bata ishuri, ubusinzi n'ibindi.

Minisitiri w'Uburinganire n'Iterambere ry'Umuryango yasabye kandi aba baturage guhindura imyumvire,  kwitabira gahunda yo kuboneza urubyaro, kubyaza umusaruro amahirwe Igihugu cyabahaye bagakora cyane kandi bakajyana abana mu ishuri bakiga cyane, bityo bakarushaho kwiteza imbere no guteza imbere Igihugu.

Yabasabye na none kwimakaza isuku ahantu hose, by'umwihariko imiryango idafite ubwiherero bwujuje ibyangombwa bisabwa igaharanira kubwubaka.

Ku ruhande rwe, Guverineri w'Intara y'Amajyaruguru yamenyesheje abitabiriye uyu muganda ko uyu munsi  hatangijwe igihembwe cyo gutera amashyamba, bityo abasaba kwitabira gutera ibiti byinshi birimo iby'imbuto bifasha kurwanya igwingira n'imirire mibi no kubungabunga ibimaze guterwa.