Kuri uyu wa kane tariki ya 29 Nzeri 2022, Koperative Dukundekawa ikorera mu Murenge wa Ruli mu Karere ka Gakenke yafunguye ku mugaragaro Uruganda rwa mbere rukaranga kawa rufite agaciro k'amafaranga y'u Rwanda angana na  miliyoni magana abiri n'ebyiri, harimo inyubako n'ibikoresho.

Ibirori byo gufungura ku mugaragaro urwo ruganda, byitabiriwe n'Abayobozi mu nzego zitandukanye barangajwe imbere na Guverineri w’Intara y’Amajyaruguru, Madamu Nyirarugero Dancille, ari na we wari Umushyitsi Mukuru muri ibyo birori, Umuyobobozi Mukuru muri Minisiteri y’Ubutegetsi bw’Igihugu ushinzwe Inzego z’Ibanze, Bwana Semwaga Angelo, Bwana Ruganintwari wari uhagarariye Ikigo cy’Igihugu gishinzwe guteza imbere iyoherezwa mu mahanga ry’ibikomoka ku Buhinzi n’Ubworozi-NAEB, Umuyobozi Wungirije w’Akarere ka Gakenke, ushinzwe Iterambere ry’Ubukungu, Bwana Niyonsenga Aimee, Inzego z’Umutekano, Abafatanyabikorwa ba Koperative Dukundekawa ndetse n'abanyamuryango b'iyi Koperative bagera ku gihumbi n'ijana na mirongo icyenda na batatu.

Mu ijambo rye, Guverineri w'Intara y'Amajyaruguru yashimiye Ubuyobozi bwa Koperative Dukundekawa n'abanyamuryango bayo imikorere myiza ibaranga n'uburyo bitabiriye guteza imbere igihingwa cya kawa.Yabashimiye kandi uburyo bakomeje kwiteza imbere no guteza imbere Igihugu babikesha iki gihingwa cya kawa ndetse n’uruhare bagira mu gushyigikira gahunda za Leta zigamije guteza imbere imibereho myiza y'abaturage, zirimo Girinka, mituweli, Ejo Heza n'izindi.

Guverineri Nyirarugero yasabye abanyamuryango ba Koperative Dukundekawa gukomeza guteza imbere igihingwa cya Kawa, barushaho kongera ubuso buhingwaho ikawa no kongera umusaruro wayo mu bwinshi no mu bwiza.Yabasabye kandi gukoresha neza amafaranga bakura mu ikawa bakarushaho kwiteza imbere no guteza imbere Akarere kabo ka Gakenke binyuze mu bikorwa by'ishoramari.

Agaruka ku Buyobozi bwa Koperative Dukundekawa, Guverineri w'Intara y'Amajyaruguru yabusabye kwimakaza imicungire myiza y'umutungo wa Koperative no gushyira imbere buri gihe inyungu z'abanyamuryango.

Ku ruhande rwe, Umuyobozi wa Koperative Dukundekawa, Mubera Celestin yavuze ko iyo Koperative mu mwaka ushize yagirishije ikawa ifite agaciro k'amafaranga y'u Rwanda asaga miliyari imwe na miliyoni magana abiri kandi ko abanyamuryango bayo bahawe agahimbazamusyi ka miliyoni zisaga mirongo icyenda n'esheshatu. Yongeyeho ko uruganda rwafunguwe uyu munsi ruzagira uruhare mu kongera amafaranga umuhinzi wa kawa atahana, kuko igiciro cy'ikilo cy'ikawa ikaranze gikubye hafi inshuro ebyiri icy'ikawa isanzwe.

Ibyo birori byaranzwe kandi no gushyikiriza abanyamuryango b'iyi Koperative inka 46 zirimo 10 zaguzwe na Koperative na 36 zituwe zikomoka ku zatanzwe mu gihe cyashize, gushyikiriza impamyabushobozi urubyiruko 40 rushoje amahugurwa, rurimo 20 rwakurikiye amahugurwa yo gufata neza no gutunganya ikawa.