Mu rwego rwo kugenzura uko ingamba zo kwirinda COVID-19 zishyirwa mu bikorwa, kuri uyu wa kane tariki ya 24 Kamena 2021, Guverineri w'Intara y'Amajyaruguru, Madamu Nyirarugero Dancille yasuye ibikorwa bitandukanye mu Murenge wa Ruli, Akarere ka Gakenke, akangurira abaturage gukaza ingamba zo kwirinda COVID-19, bitwararika gushyira mu bikorwa amabwiriza yose yashyizweho n’Inama y’Abaminisitiri yateranye ku itariki ya 21 Kamena 2021 ajyanye no kwirinda iki cyorezo.

Ni uruzinduko Guverineri w’Intara y’Amajyaruguru yatangiriye ku ruganda rutunganya ikawa rwa Dukundekawa, aho yasuye ibice bitandukanye by’urwo ruganda n’amatsinda abiri y'abagore barukoramo, iry'abagore bajonjora ikawa n'abakora imitako na “cotex”, bifashishije ibikoresho biboneka mu Rwanda.

Mu butumwa yagejeje kuri abo bagore, Guverineri Nyirarugero yabasabye gukomeza kwirinda COVID-19 no gukangurira imiryango yabo kuyirinda, kubyaza amahirwe akazi bahawe, bizigamira muri Ejo Heza, batanga mituweli ku gihe, banitabira n'izindi gahunda z'iterambere.

Uru ruzinduko mu Murenge wa Ruli, Guverineri w'Intara y'Amajyaruguru n'abo bari kumwe, barukomereje mu Ishuri Rikuru ry'Abaforomo n'Ababyaza rya Ruli, aho basuye ibice byaryo bitandukanye, berekwa imfashanyigisho zitandukanye zifasha abanyeshuri baryigamo gushyira mu ngiro amasomo bahabwa y'ubuforomo n'ububyaza.

Aganira na bamwe mu banyeshuri biga muri iri shuri, Guverineri Nyirarugero yabasabye kugira umurava n'umuhate mu masomo bahabwa, bityo impamyabumenyi bazahavana zikazaba zifite agaciro zikwiye kandi zikazabafasha kwigirira akamaro no kukagirira Igihugu. Yabasabye kandi kurwinda icyorezo cya COVID-19, gukunda Igihugu no kurangwa na disipuline.

Guverineri w’Intara y’Amajyaruguru yasuye kandi Ibitaro bya Ruli, aho yatambagijwe ibice bitandukanye bibigize, aganira n'abaje kubyivurizamo, aho yabakanguriye kwirinda COVID-19 no gutangira mituweli ku gihe. Ku ruhande rw'Ibitaro, yabisabye gukomeza gutanga serivisi nziza ku babigana.

Muri Centre y’ubucuruzi ya Ruli na yo yasuwe kuri uyu munsi, Guverineri wIntara y'Amajyaruguru yakanguriye abayikoreramo kubahiriza amabwiriza yo kwirinda COVID-19, bagenzura ko za kandagira ukarabe ziri imbere y'amaduka yabo zirimo amazi meza kandi hari n'isabune, kwibutsa abakiriya guhana intera no kubahiriza amasaha ya saa kumi n'ebyiri yo gufunga ibikorwa by'ubucuruzi.

Uruzinduko rwa Guverineri w’Intara y’Amajyaruguru mu Murenge wa Ruli rwashojwe n’inama yakoranye n'abagize Command Post ya COVID-19 y'uwo murenge, aho yabasabye kurangwa n’ubufatanye mu GUkumira ikwirakwira rya COVID-19 no gushyira ingufu mu gukurikirana abarwayi ba COVID-19 barwariye mu ngo.