Ibi Abavuga Rikumvikana “Opinion Leaders” bo mu Mirenge ya Coko, Minazi, Muyongwe na Rushashi mu Karere ka Gakenke babisabwe na Guverineri w’Intara y’Amajyaruguru mu nama yakoranye na bo kuri uyu wa kane tariki ya 03 Kamena 2021. Iyi nama yabereye mu cyumba cy’inama cy’Umurenge wa Rushashi, yitabiriwe n’abagize Inama y’Umutekano itaguye y’Intara y’Amajyaruguru, Ubuyobozi bw’Akarere ka Gakenke, abavuga rikumvikana bo mu Mirenge yavuzwe haruguru, bagizwe n’abayobozi b’Inzego z’Ibanze kuva ku Munyamabanga Nshingwabikorwa w’Umurenge kugeza kuri mutwarasibo, abaharariye amadini n’amatorero, abahagarariye urubyiruko, abahagarariye inzego z’abagore, abahagarariye abikorera ndetse n’abajyanama b’ubuzima.

Muri iyi nama, abavuga rikumvikana bo muri iyi mirenge bibukijwe inshingano zabo n'uruhare rwabo mu mu guharanira no guteza imbere imibereho y'abaturage, aho basabwe kudatezuka ku rugamba rwo kuba ku isonga mu guharanira no guteza imbere imibereho y’abaturage.

Mu byo Guverineri Nyirarugero n'abo bari kumwe basabye abavuga rikumvikana bo muri iyi Mirenge, harimo, kwegera abaturage, kubakemurira ibibazo no kubakundisha gahunda zose za Leta no guha agaciro no gufata neza ibikorwa bibakorerwa.  Basabwe kandi kuba intangarugero ku baturage barangaje imbere, baba aba mbere mu gushyira mu bikorwa gahunda za Leta, gukemura ibibazo by'amakimbirane bikiboneka mu miryango n'ihohoterwa rikorerwa abangavu no gushishikariza abaturage kwizigamira muri gahunda ya Ejo Heza no kwitabira gutanga mituweli.

By'umwihariko, abavuga rikumvikana bo muri iyi Mirenge basabwe gukomeza kugira uruhare mu kubungabunga umutekano, kuko ari wo musingi w'ibikorwa byose by'iterambere rirambye. Bibukijwe kandi ko icyorezo cya COVID-19 kigihari, bityo ko bagomba gukomeza gushishikariza abaturage kukirinda.

Ku ruhande rwabo, abavuga rikumvikana bo mu Mirenge yavuzwe haruguru, barishimira ibikorwa by'iterambere Leta y'u Rwanda imaze kubagezaho, birimo umuhanda Giticyinyoni-Ruli-Rushashi-Gakenke, kuko ubu ari nyabagendwa kandi mu gihe kiri imbere uzashyirwamo kaburimo, amazi n'amashanyarazi bari kugenda bagezwaho n'ibindi bikorwa bitandukanye bigamije imibereho myiza y'abaturage. Basabye ko aho ibikorwaremezo nk'amazi n'amashanyarazi bitaragezwa na ho hatekerezwaho mu minsi iri imbere. Abavuga rikumvikana bo mu Mirenge ya Coko, Minazi, Muyongwe na Rushashi bijeje Guverineri n'abayobozi bari kumwe ko badateze kudohoka mu rugamba rwo guharanira no guteza imbere imibereho y'abaturage.