Kuri uyu wa gatanu tariki ya 01 Ukwakira 2021, mu Karere ka Burera, habereye igikorwa cyo gusoza amahugurwa y'iminsi 10 y'imboni z'umutekano zigizwe n'urubyiruko 634 barimo abakobwa 42 , bagiye kunganira mu bikorwa byo kurwanya ibiyobyabwenge, magendu no kwambuka umupaka binyuranyije n'amategeko, babikesha amasomo atandukanye bahawe, arimo  ajyanye n’ubwitange no gukunda Igihugu; urujya n’uruza ku mipaka n’amategeko abigenga; uburyo bwo gucunga umutekano w’umupaka ku manywa na nijoro; ingaruka zo gukoresha ibiyobyabwenge n’ayandi.

Umushyitsi Mukuru muri iki gikorwa cyabereye mu Murenge wa Kinoni, yari Umunyamabanga wa Leta muri Minisiteri y'Urubyiruko n'Umuco, Hon Bamporiki Edouard, aho yakiriwe na Guverineri w'Intara y'Amajyaruguru, Madamu Nyirarugero Dancille, Umuyobozi w'Ingabo mu Ntara, Brig Gen John Bosco Rutikanga, Umuyobozi w'Inkeragutabara mu Ntara, Maj Gen Eric Murokore, Umuyobozi wa Polisi mu Ntara, CSP Francis Muheto n'Ubuyobozi bw'Akarere ka Burera.

Mu kiganiro, “Ndi Umunyarwanda, Isanomuzi ihuza Abanyarwanda” yahaye abitabiriye aya mahugurwa, Hon Bamporiki yabibukije kuzirikana ko u Rwanda ari Igihugu cyacu twese, bityo ko buri wese agomba kurukunda no guharanira ko rutekana ndetse no guhora yiteguye kurwimana.

Yabibukije kandi guhora bashyize imbere inyungu z'u Rwanda mbere y'izabo bwite, kuko ari byo bizabashoboza gutahiriza umugozi umwe mu nshingano bagiye kujyamo, aho yagize ati, “Iyo ushyize u Rwanda imbere, bikubera intwaro yo kudatsindwa”.

Urubyiruko rwashoje amahugurwa rwamenyeshejwe ko ikigamijwe ari uguhangana n'ibiyobyabwenge, magendu no kwambuka umupaka mu buryo bunyuranyije n'amategeko, bityo ko icyo rwitezweho ari ukugira uruhare rufatika mu guhagarika burundu ibyo bikorwa bitemewe.

Uru rubyiruko rwasabwe kuzarangwa n'ubunyangamugayo n'imyitwaririre myiza mu nshingano ruhamagariwe no kuzirinda icyo ari cyo cyose cyazanduza isura yarwo, harimo gukingira ikibaba abinjiza ibiyobyabwenge na magendu, ruswa n'ibindi.

Ku ruhande rwabo, abasore n'inkumi bashoje amahugurwa, bijeje abayobozi ko ubumenyi bayakuyemo buje bwiyongera ku bushake basanganywe, bizabafasha gusohoza uko bikwiye inshingano bagiyemo zo gukumira ibiyobyabwenge, magendu no kwambuka umupaka binyuranyije n’amategeko.

Dusingizumukiza Firmin wavuze mu izina ry’abashoje amahugurwa akaba yabihamirije imbere y’abayobozi agira ati, “Twiyemeje kuba Imboni z’umutekano mu kurandura burundu ibiyobyabwenge, magendu no kwambuka umupaka mu nzira zitubahirije amategeko. Turabyiyemeje kandi tuzabugeraho dufatanyije n’inzego zose bireba”.

Twabamenyesha ko abashoje aya mahugurwa baturutse mu mirenge itandatu y’Akarere ka Burera ikora ku mupaka, ari yo, Bungwe, Butaro, Cyanika, Kagogo, Kinyababa na Kivuye