Mu nama yakoranye n’abavuga rikumvikana mu Mirenge ya Butaro na Kivuye mu Karere ka Burera kuri uyu wa kabiri tariki ya 03 Kanama 20221, Guverineri w’Intara y’Amajyaruguru, Madamu Nyirarugero Dancille yasabye ba mudugudu na ba mutwarasibo bo muri iyo mirenge, gufata iya mbere mu kurandura ibiyobyabwenge byiganjemo kanyanga, bikigaragara muri ako gace. Iyi nama yari igamijwe kuganira ku kibazo cy’ibiyobyabwenge bikunze kugaragara mu mirenge ituriye umupaka w’Ighugu cya Uganda no gufata ingamba zo kubirwanya no kubirandura burundu, yitabiriwe na Musenyeri John Rucyahana, Perezida wa Komisiyo y’Igihugu y’Ubumwe n’Ubwiyunge, bamwe mu bagize Inama itaguye y’Umutekano y’Intara y’Amajyaruguru, Ubuyobozi bw’Akarere ka Burera n’abavuga rikumvikana bo mu byiciro bitandukanye bo mu mirenge yavuzwe haruguru.

Mu butumwa yagejeje ku bitabiriye inama, Guverineri Nyirarugero yasabye abayobozi mu nzego z’ibanze, barimo ba mudugudu na ba mutwarasibo, kwirinda kuba ba siniteranya bakingira ikibaba abinjiza ibiyobyabwenge mu Gihugu, ababitunda, ababicuruza n’ababinywa, ahubwo bakagira uruhare rufatika mu kubagaragaza kugira ngo bakurikiranwe. Yashimangiye ko buri wese nabigiramo uruhare, nta kabuza ibiyobyabwenge bicika burundu bigasigara ari amateka muri ako gace. Yagize ati, “Mutwarasibo nabigira ibye, mudugudu akabigira ibye, Gitifu w'Akagari akabigira ibye, abayobozi bose bakabigira ibyabo, nta kabuza ikibazo cy'ibiyobyabwenge bikigaragara muri aka gace, tuzakirandura burundu, bisigare ari amateka”.

Guverineri Nyirarugero yagaragaje kandi ko kuba ibiyobyabwenge byinjira mu Gihugu kandi aho byinjirira hari abayobozi, bigaragaza kudohoka ku nshingano kwa bamwe muri abo bayobozi, ahanini bituruka ku kuba hari abakingira ikibaba ababyishoramo bitewe n’isano bafitanye cyangwa se na bo ubwabo bakaba babifiteho uruhare. Yaboneyeho kubibutsa ko hagiye gukorwa igenzura rigaraza abayobozi n’abaturage bijandika mu biyobyabwenge kandi ko uwo bizagaragara ko abifitemo uruhare runaka azabihanirwa.

Mu kiganiro yahaye abitabiriye inama, Musenyeri Rucyahana yabwiye ko kurwanya ibiyobyabwenge bigomba gushingira ku muryango no ku burere buhabwa abana. Yagize ati, “Kugira ngo dushobore kurwanya ibiyobyabwenge twivuye inyuma, tugomba guhera ku muryango, tukita ku burere bw'abana bacu, ku rubyiruko rwacu kandi tukarushaho kunga ubumwe mu muryango”.

Musenyeri Rucyahana yasabye Abayobozi mu nzego zitandukanye gufatanya kurwanya ibiyobyabwenge aho biva bikagera, kuko ingaruka zabyo nta we zitageraho. Yagize ati, “Mureke turerere u Rwanda ruzira ibiyobyabwenge. Niba umuturanyi wawe anywa cyangwa acuruza kanyaga cyangwa ibindi biyobyabwenge; mugire inama yo kubireka kuko nubirenza amaso wibwira ko ibyo akora nta cyo bigutwaye, uzaba wibeshya. Niba nta cyo ukoze ngo abicikeho; menya ko ingaruka zabyo zizakugeraho byanze bikunze. Bayobozi muri aha; muhaguruke turwanye ibiyobyabwenge, tubirinde urubyiruko, bityo dutegure Abanyarwanda bazima bazigirira akamaro; bakanakagirira Igihugu.”

Uhagarariye Urwego rw'Igihugu rushinzwe Ubugenzacyaha-RIB mu Ntara y’Amajyaruguru, MUKAMANA Béline yagaragaje ko ibyaha birimo gukubita, gukomeretsa no gusambanya abana bikorwa ahanini n’abanyoye ibiyobyabwenge; asaba Abayobozi bitabiriye inama kongera imbaraga mu gukangurira abaturage kubyirinda no kubirwanya batanga amakuru y’ukuri yerekeranye n’ababyishoramo.

Ku ruhande rwabo, abavuga rikumvikana bo mu Mirenge ya Butaro na Kivuye biyemeje gukaza ingamba zo guhangana n'ikibazo cy'ibiyobyabwenge, barushaho gukurikirana amakuru y'abaturage barangaje imbere no kumenya uwo ari we wese wishora mu bikorwa by'uburembetsi ndetse no kumugaragazaz kugira ngo akurikiranwe.