Kuri uyu wa gatandatu, tariki ya 21 Werurwe 2026, mu Karere ka Musanze habereye imikino y’amarushanwa Umurenge Kagame Cup ku rwego rw’Intara y’Amajyaruguru, igamije gutoranya amakipe n’abakinnyi bazahagararira iyi Ntara ku rwego rw’Igihugu.

Aya marushanwa yahuje amakipe atandukanye yaturutse mu turere tugize Intara y’Amajyaruguru, ahatanira imyanya mu mikino inyuranye irimo Basketball, Volleyball, Sitball, igisoro, gusiganwa ku magare ndetse no gusiganwa ku maguru.

Nyuma y’imikino yose, amakipe azahagararira Intara y’Amajyaruguru mu marushanwa y’Igihugu yamaze kumenyekana mu byiciro bitandukanye, ku buryo bukurikira: 

Mu cyiciro cy’abagabo:

• Basketball: Musanze 

• Volleyball: Musanze 

• Sitball: Musanze 

Mu cyiciro cy’abagore:

• Basketball: Musanze 

• Volleyball: Gicumbi 

• Sitball: Gicumbi 

Ku bijyanye n’umupira w’amaguru (Football), ikipe izahagararira Intara y’Amajyaruguru izamenyekana ku cyumweru, tariki ya 29 Werurwe 2026, nyuma y’umukino wa nyuma uzabera muri iyi Ntara.

Amarushanwa ”Umurenge Kagame Cup” akomeje kugaragaza uruhare rukomeye mu guteza imbere impano z’abakinnyi bo mu nzego z’ibanze, anafasha mu gushimangira imiyoborere myiza n’iterambere rya siporo mu baturage.