Kuri uyu wa mbere tariki ya 14 Werurwe 2022 mu Turere twose tugize Intara y'Amajyaruguru hatangijwe Urugerero rw'Inkomezabigwi, icyiciro cya 9/2022, rwitabiriwe n'intore zarangije Amashuri yisumbuye mu mwaka wa 2021. Ku rwego rw'Intara y'Amajyaruguru, uru rugerero rwatangirijwe mu Karere ka Musanze, Umurenge wa Musanze, Akagari ka Nyarubuye.

Urugerero rw’uyu mwaka rufite insangamatsiko igira iti, "Duhamye Umuco w'Ubutore ku Rugerero rwo Kwigira", rwatangirijwe ku gikorwa cyo kubakira inzu n'ubwiherero umuryango utishoboye wa Mpiranyi Emmanuel na Nyiraguhirwa Florida.

Icyo gikorwa cyitabiriwe na Minisitiri w'Ubutegetsi bw'Igihugu, Hon Gatabazi Jean Marie Vianney, Guverineri w'Intara y'Amajyaruguru, Madamu Nyirarugero Dancille, Umuyobozi Nshingwabikorwa muri Minisiteri y’Ubumwe bw’Abanyarwanda n’Inshingano Mboneragihugu, Madamu Kayirangwa Anitha, Inzego z'Umutekano ndetse n'abaturage b'Umurenge wa Musanze.

Nk’uko byagarutsweho mu mihigo y’Intore ziri ku Rugerero mu Murenge wa Musanze, ibikorwa bizibandwaho mu gihe kigera ku mezi abiri n’igice urwo rugerero ruzamara, ni ibikorwa bigamije gusubiza bimwe mu bibazo bibangamiye imibereho myiza y’abaturage, birimo kubakira amazu n’ubwiherero imiryango itishoboye, aho muri uwo murenge hazubakwa amazu ane n’ubwiherero 22. Hari kandi gucukura ingarani magana inani n’ebyiri, kurwanya ibiyobyabwenge n’inda zidateganyijwe, kugarura mu ishuri abana baritaye bagera kuri magana atanu na makumyabiri na babiri, kurwanya ibiyobyabwenge mu rubyiruko n’ubuzererezi ndetse no gukora ubukangurambaga ku isuku. Izo ntore zahize kandi kugira uruhare mu myiteguro ya gahunda zo kwibuka ku nshuro ya 28 Jenoside yakorewe Abatutsi, kwinjiza muri gahunda ya Ejo Heza abanyamuryango bashya magana atanu no gushishikariza abaturage kwikingiza COVID-19.

Atangiza ku mugaragaro urwo Rugerero, Minisitiri Gatabazi yibukije ko Urugero ruri mu mateka y’u Rwanda no mu Itegeko Nshinga rya Repubulika y’u Rwanda kandi rugamije kwihutisha iterambere ry’Igihugu. Yakomeje avuga ko Urugerero rw’uyu mwaka ruje mu bihe bigoranye kubera icyorezo cya COVID-19 kikibasiye Isi yose, ari na yo mpamvu uwo rugerero rugomba gukorwa mu buryo budaciye ingando bitandukanye n’uburyo rwari rusanzwe rukorwamo. Yongeyeho ko ariko ibyo bitagomba kubangamira gahunda z’ibikorwa izo ntore zigomba gukora no kugeraho.

Minisitiri Gatabazi yasabye izo ntore kurangwa n'indangagaciro na kirazira, kurangwa n'ubumwe no kuba bandebereho mu bikorwa byayo bya buri munsi. Yazisabye kandi kurwanya ibiyobyabwenge mu rubyiruko n'inda ziterwa abangavu, kugira uruhare mu gutegura gahunda zo kwibuka ku nshuro ya 28 Jenoside yakorewe Abatutsi, gufasha kugarura mu ishuri abana baritaye no kugira uruhare mu guca burundu ubuzererezi.

Ikindi yasabye ni uko urwo rugerero rwazaba umwanya wo kuganira n’abakuru kandi impanuro izo ntore zizahabwa na zo zikazazisangiza barumuna babo, bityo bikazababera imbarutso yo kurushaho kunga ubumwe no guharanira ko buzahoraho. Yazisabye na none ko ibikorwa bazakora ku rugero bikwiye no kubaranga mu miryango bakomokamo, bityo bagahora ari bandebereho.

Ku ruhande rwe, Guverineri w’Intara y’Amajyaruguru yasabye intore ziri ku rugerero kuzakora neza ibikorwa byateguwe no kuzabigeraho byose ndetse azizeza ko Ubuyobozi mu nzego zitandukanye buzaziba hafi muri urwo rugendo.

Umuyobozi Nshingwabikorwa muri Minisiteri y’Ubumwe bw’Abanyarwanda, yasabye urwo rubyiruko gukoresha imbaraga zabo mu bikorwa byubaka Igihugu no gusigasira ubumwe bw’Abanyarwanda kuko ari bwo buzatuma u Rwanda rukomeza kuramba no kwaguka.

Twabamenyesha ko Urugerero rwatangijwe kuri uyu wa mbere tariki ya 14 Werurwe ruzasozwa ku itariki ya 25 Gicurasi 2022.