Kuri wa kane, tariki ya 20 Nyakanga 2023 mu Kigo cya Mutobo cya Komisiyo ishinzwe gusezerera no gusubiza mu buzima busanzwe abahoze ari abasirikare, giherereye mu Karere ka Musanze, habereye umuhango wo gusezerera no gusubiza mu buzima busanzwe abahoze ari abarwanyi mu mitwe itandukanye ikorera hanze y'Igihugu cy'u Rwanda, icyiciro cya 69, bagera kuri 92.

Ni umuhango witabiriwe n'Abayobozi batandukanye, barangajwe imbere na Minisitiri w'Ubutegetsi bw'Igihugu, Hon Musabyimana Jean Claude, ari na we wari Umushyitsi Mukuru, Guverineri w'Intara y'Amajyaruguru, Madamu Nyirarugero Dancille, Perezida wa Komisiyo ishinzwe gusezerera no gusubiza mu buzima busanzwe abahoze ari abasirikare, Madamu Nyirahabineza Valerie, Inzego z'Umutekano, abahagarariye Ibihugu byabo mu Rwanda n'abandi bafatanyabikorwa batandukanye.

Mu ijambo rye, Minisitiri w'Ubutegetsi bw'Igihugu yashimiye abasoje amasomo ku mwanzuro mwiza bafashe wo kureka gutema ishami ry'igiti bicayeho, bityo bagahitamo kurambika intwaro hasi, bakagaruka mu Rwanda rwababyaye ari na ko biteguye gutanga umusanzu wabo mu kongera kurwubaka

Yabasabye kutazatatira ihame ry'ubumwe n'ubudaheranwa by'Abanyarwanda no kutazahirahira gukoma mu nkokora intambwe nziza kandi ishimishije u Rwanda rumaze gutera muri gahunda na porogaramu zitandukanye z'igihugu, zigamije kucyubaka no guhora kijya heza kurushaho.

Yabasabye kandi kuzagaragaza ko amahugurwa bahawe yabagiriye akamaro, agatuma bahinduka mu bitekerezo no mu migenzereze kandi bakazahorana intego yo gusigasira no kubungabunga umutekano Igihugu kimaze kugeraho.

Yabasabye gufatanya n'abandi Banyarwanda muri gahunda z'Igihugu zihari zifasha abaturage kwiteza imbere no guhindura imibereho myiza yabo, kwivana mu bukene no gukora bakiteza imbere kandi bakagira n'uruhare mu guteza imbere Igihugu.

Ikindi yabasabye ni ukuba intumwa nziza no gukangurira abo basize mu mashyamba kurambika intwaro hasi bagataha kandi bakagira n'uruhare mu kunyomoza ibihuha by'abaharabika u Rwanda, bituma abakiri mu mashyamba badataha.

Minisitiri w'Ubutegetsi bw'Igihugu yasoje abizeza ko Leta y'u Rwanda ibinyujije muri Komisiyo ishinzwe gusezerera no gusubiza mu buzima busanzwe abari abasirikare, yiteguye kubafasha ikabaha ibikoresho by'ibanze bijyanye n'imyuga bize kugira ngo bazabashe kujya ku isoko ry'umurimo bashobore kwiteza no guteza imbere ingo zabo n'Igihugu muri rusange.

Ku ruhande rwe, Guverineri w'Intara y'Amajyaruguru yabwiye abasoje amasomo ko Ubuyobozi mu nzego zitandukanye bwiteguye gufatanya n'imiryango yabo n'abaturage mu kubafasha gushyira mu bikorwa amasomo bahawe n'impano zitandukanye bifitemo, bityo na bo bakazabasha kwiteza imbere no guteza imbere Igihugu.

Perezida wa Komisiyo ishinzwe gusezerera no gusubiza mu buzima busanzwe abahoze ari abasirikare, Madamu Nyirahabineza Valerie yavuze ko abasezerewe bahawe ibiganiro, birimo amasomo y'uburere mboneragihugu abafasha kumenya neza gahunda za Leta ndetse akanabakangurira guhindura imyumvire, bityo bagafatanya n'abandi Banyarwanda kubaka Igihugu. Yavuze kandi ko bigishijwe amasomo y'imyuga atandukanye, arimo ubwubatsi, ubuhinzi, gukora amazi n'amashanyarazi, gusudira, gukanika imodoka n'ayandi, azabafasha kujya ku isoko ry'umurimo no kwiteza imbere.

Gen. Maj. Nsanzumuhire Félicien wavuze mu izina ry'abasubijwe mu buzima busanzwe, yashimiye Ubuyobozi bw'Igihugu cy'u Rwanda, burangajwe imbere na Nyakubahwa Perezida wa Repubulika Paul Kagame, uburyo bwabakiriye neza butitaye ku kuba barabarizwaga mu mitwe yitwaje intwaro yarwanyaga Leta y'u Rwanda. Yashimye kandi amasomo atandukanye bahawe arimo n'ibiganiro bijyanye n'amateka y'u Rwanda, aho yashimangiye ko yabateguriye kuba Abanyarwanda b'inyangamugayo bafite indangagaciro za "Ndi Umunyarwanda", zizabashoboza kwigira no kwiteza imbere ari nako bateza imbere Igihugu.

Umuhango wo gusezerera no gusubiza mu buzima busanzwe abahoze mu mitwe ya gisirikare ikorera mu mashyamba ya Repubulika iharanira Demokarasi ya Kongo, waranzwe kandi no kubashyikiriza ibyemezo bigaragaza imyuga bize n'ibyangombwa, birimo indangamuntu n'icyemezo cyo gusezererwa mu ngabo ku bari abasirikare.