Kuri uyu wa kabiri tariki ya 22 Ukwakira 2024 mu Kigo cya Mutobo cya Komisiyo ishinzwe gusezerera no gusubiza mu buzima busanzwe abari abasirikare, giherereye mu Murenge wa Busogo mu Karere ka Musanze, habereye umuhango wo gusezerera no gusubiza mu buzima busanzwe abagera kuri 39 bahoze mu mitwe yitwaje intwaro irwanya u Rwanda, icyiciro cya 72.

Ni umuhango witabiriwe n'Abayobozi batandukanye, barimo Guverineri w'Intara y'Amajyaruguru, Mugabowagahunde Maurice, ari na we wari Umushyitsi Mukuru, Perezida wa Komisiyo ishinzwe gusezerera no gusubiza mu buzima busanzwe abari abasirikare, Nyirahabineza Valérie, Inzego z'Umutekano, ba Ambasaderi  n'abafatanyabikorwa batandukanye.

Mu butumwa bwe, Guverineri w'Intara y'Amajyaruguru yashimiye abasoje amahugurwa ku cyemezo cyiza bafashe cyo kureka gukomeza gutema ishami bicayeho, bagahitamo kurambika intwaro hasi, bagataha mu Gihugu cyababyaye ari na ko biteguye gutanga umusanzu wabo mu kucyubaka.

Guverineri w'Intara y'Amajyaruguru yabasabye kutazatatira ihame ry'ubumwe bw'Abanyarwanda no kutazahirahira gukoma mu nkokora intambwe ishimishije u Rwanda rumaze gutera muri gahunda zitandukanye no gufatanya n'abandi Banyarwanda gukora cyane no kwivana mu bukene no guteza imbere Igihugu.

Yabasabye kandi kubyaza umusaruro amahugurwa bahawe no guhinduka mu bitekerezo no mu migenzereze yabo. Yanabasabye kuzaba intumwa nziza no gukangurira abo basize mu mashyamba gutaha ku bushake ndetse no kugira uruhare mu kunyomoza abaharabika u Rwanda.

Yasoje ijambo rye abizeza ko Leta y'u Rwanda izakomeza kubaba hafi no kubafasha mu buzima busanzwe bagiyemo, ko ariko na bo bagomba gukoresha ubumenyi bahawe kugira ngo bashobore kujya ku isoko ry'umurimo, bityo biteze imbere ndetse banateze imbere Igihugu.

Perezida wa Komisiyo ishinzwe gusezerera no gusubiza mu buzima busanzwe abari abasirikare yavuze ko abasezerewe bahawe amasomo n'ibiganiro, byabafashije gusobanukirwa neza gahunda zitandukanye za Leta no guhindura imyumvire ndetse ko bizabafasha gufatanya n'abandi kubaka Igihugu

Yavuze kandi ko bigishijwe amasomo y'imyuga atandukanye, arimo ubwubatsi, ubudozi, ubuhinzi, gukora amazi n'amashanyarazi, gusudira, gukanika imodoka, gutunganya imisatsi n'ayandi, azabafasha kujya ku isoko ry'umurimo no kwiteza imbere.

Muhire Emmanuel wavuze mu izina ry'abasezerewe, yashimiye Ubuyobozi bw'Igihugu, burangajwe imbere na Nyakubahwa Perezida wa Repubulik, Paul Kagame, uburyo bwabakiriye neza butitaye ku kuba barabarizwaga mu mitwe yitwaje intwaro yarwanyaga Leta y'u Rwanda.

Muhire yashimye kandi amasomo atandukanye bahawe arimo n'ibiganiro kuri gahunda za Leta, aho yashimangiye ko yabateguriye kuba Abanyarwanda b'inyangamugayo bafite indangagaciro zizabashoboza kwigira no kwiteza imbere ari nako bateza imbere Igihugu.

Umuhango wo gusezerera no gusubiza mu buzima busanzwe abahoze mu mitwe yitwaje intwaro, waranzwe kandi no kubashyikiriza ibyemezo n'ibyangombwa, birimo indangamuntu n'ikarita yo gusezererwa mu gisirikare ndetse n'ibikoresho bitandukanye bijyanye n'imyuga bize.