Mu Ntara y’Amajyaruguru habereye ibiganiro byagarutse ku rugendo rw’Ubumwe n’Ubudaheranwa bw’Abanyarwanda muri iyi Ntara

Kuri uyu wa gatatu, tariki ya 14 Ukwakira 2026, i Musanze habereye ibiganiro by’Ihuriro ry’Ubumwe n’Ubudaheranwa bw’Abanyarwanda ku rwego rw’Intara y’Amajyaruguru, bifite insanganyamatsiko igira iti: “Ubumwe n’Ubudaheranwa: Amahitamo Yacu.”

Ibi biganiro byateguwe ku bufatanye bwa Unity Club Intwararumuri, Minisiteri y’Ubumwe bw’Abanyarwanda n’Inshingano Mboneragihugu n’Intara y’Amajyaruguru, byitabirwa n’abantu barenga 500 barimo abayobozi mu nzego zitandukanye, urubyiruko n’abahagarariye ibyiciro binyuranye by’abaturage, baturutse mu Turere twa Burera, Gakenke, Musanze na Rulindo.

Mu bayobozi bitabiriye ibi biganiro harimo Minisitiri w’Uburinganire n’Iterambere ry’Umuryango, Hon. Uwimana Consolée, wari Umushyitsi Mukuru, Umuyobozi Mukuru Wungirije wa Mbere wa Unity Club Intwararumuri akaba n’Umunyamabanga wa Leta muri Minisiteri y’Ubutegetsi bw’Igihugu, Hon. Kayisire Marie Solange; Guverineri w’Intara y’Amajyaruguru, Hon. Mugabowagahunde Maurice, Abadepite mu Nteko Ishinga Amategeko, abigeze kuyobora inzego nkuru za Leta, abayobozi mu nzego zitandukanye n’abandi bahagarariye ibyiciro binyuranye by’abaturage bo mu Ntara y’Amajyaruguru.

Mu ijambo ry’ikaze, Guverineri w’Intara y’Amajyaruguru yihanganishije abaturage bo muri iyi Ntara muri rusange, by’umwihariko abo mu Karere ka Musanze bacururizaga mu isoko rya GOICO riherutse kwibasirwa n’inkongi y’umuriro.

Agaruka ku rugendo rw’Ubumwe n’Ubudaheranwa mu Ntara y’Amajyaruguru, yagaragaje bimwe mu bibazo bikigaragara, birimo ingengabitekerezo ya Jenoside igaragara mu rubyiruko, itotezwa ry’abarokotse Jenoside yakorewe Abatutsi, imanza za Gacaca zitararangizwa n’imibiri y’abazize Jenoside itaraboneka ngo ishyingurwe mu cyubahiro.

Yagaragaje ko, n'ubwo hakiri izo mbogamizi, urugendo rw’Ubumwe n’Ubudaheranwa mu Ntara y’Amajyaruguru rumaze gutera intambwe ishimishije muri rusange, ahereye ku bipimo byagaragajwe, aho igipimo cy’Ubumwe bw’Abanyarwanda muri iyi Ntara kigeze kuri 95.3%.

Guverineri  yanagarutse ku mateka yaranze u Rwanda, by’umwihariko ayaranze Intara y’Amajyaruguru, agaragaza n’ibimenyetso bikigaragaza ayo mateka.

Yashimangiye ko ibiganiro nk’ibi bikwiye kuba umwanya wo kwisanzura, gusasa inzobe no kuvugisha ukuri ku mateka igihugu cyanyuzemo, kugira ngo hagaragazwe ibikibangamiye ubumwe n’ubudaheranwa, hafatwe ingamba zifatika zo kubikemura no kurushaho kubaka ubumwe bw’Abanyarwanda.

Atangiza ku mugaragaro ibiganiro by’iri huriro, Minisitiri w’Uburinganire n’Iterambere ry’Umuryango, Hon. Uwimana Consolée, na we yihanganishije abaturage bo mu Karere ka Musanze n’Abanyarwanda muri rusange bagizweho ingaruka n’inkongi y’umuriro yibasiye isoko rya GOICO.

Yasabye abitabiriye ibi biganiro gufata uyu mwanya nk’amahirwe yo gusubiza amaso inyuma, bakarebera hamwe urugendo u Rwanda rumaze gukora mu kubaka ubumwe n’ubudaheranwa nyuma y’ihagarikwa rya Jenoside yakorewe Abatutsi mu 1994.

Yashimangiye ko ubumwe ari umusingi w’iterambere rirambye ry’Igihugu, mu gihe ubudaheranwa ari imbaraga zituma Abanyarwanda bakomeza kwiyubaka no guhangana n’ingorane igihugu gihura na zo.

Yagaragaje ko gukomeza gushyira hamwe no guharanira icyerekezo kimwe bizatuma Abanyarwanda bashobora guhangana n’imbogamizi zose, bakagera ku ntego biyemeje.

Minisitiri Uwimana yanagarutse ku mateka yaranze ubuyobozi bwaranzwe n’amacakubiri muri Perefegitura ya Ruhengeri mu gihe cya Repubulika ya mbere n’iya kabiri, ndetse no ku bitero by’abacengezi byahitanye abaturage benshi bo mu Ntara y’Amajyaruguru.

Yagaragaje kandi uruhare rw’imiryango imwe n’imwe mu guhisha abacengezi no kohereza abana babo mu mashyamba kugira ngo bajye gufatanya n’abari mu mutwe wa FDLR.

Yasobanuye ko ibiganiro nk’ibi ari umwanya ukwiye wo gusasa inzobe, kuvugisha ukuri no kungurana ibitekerezo ku mateka u Rwanda rwanyuzemo, hagamijwe gukomeza kubaka igihugu gishingiye ku bumwe, ubwiyunge n’ubudaheranwa. Yashimangiye ko aya mateka ari ay’Abanyarwanda bose kandi ko kuyasuzumira hamwe bifasha gukemura ibibazo bikigaragara, kuyigiraho no guha abakiri bato ubumenyi buzabafasha kurinda ibyagezweho no gukomeza kubaka ejo hazaza h’Igihugu.

Mu rwego rwo kurushaho gusobanukirwa amateka y’igihugu n’urugendo rwo kukiyubaka, abitabiriye ibiganiro bagejejweho ikiganiro nyunguranabitekerezo (panel), cyibanze ku bihe bikomeye u Rwanda rwanyuzemo, urugendo rwo kubohora igihugu n’intambwe rumaze gutera mu kwiyubaka, by’umwihariko mu kwimakaza ubumwe n’ubudaheranwa bw’Abanyarwanda.

Abitabiriye kandi bahawe umwanya wo gutanga ibitekerezo no kunguranam ibitekerezo ku rugendo rw’Ubumwe n’Ubudaheranwa, ibibazo bikigaragara n’ingamba zikwiye gushyirwa imbere kugira ngo Abanyarwanda barusheho kubaka icyizere, kwimakaza ubumwe no guharanira ejo hazaza heza h’Igihugu.