Hafunguwe imurikagurisha ry’Intara y’Amajyaruguru 2026, abaryitabiriye basabwa kubyaza umusaruro amahirwe ahari

Ku gicamunsi cyo ku wa gatandatu, tariki ya 22 Kanama 2026, kuri Sitade Ubworoherane mu Karere ka Musanze, hafunguwe ku mugaragaro Imurikagurisha ry’Intara y’Amajyaruguru 2026, ryitabiriwe n’abamurika ibikorwa, ibicuruzwa na serivisi bitandukanye.

Iki gikorwa cyayobowe na Guverineri w’Intara y’Amajyaruguru, Mugabowagahunde Maurice, cyitabiriwe n’abagize Inama y’Umutekano itaguye y’Intara y’Amajyaruguru, intumwa y’Urugaga rw’Abikorera ku rwego rw’Igihugu, Karangwa Ephrem, Umuyobozi w’Urugaga rw’Abikorera ku rwego rw’Intara, Tugengwanayo Theonas, abayobozi b’Uturere tugize Intara y’Amajyaruguru, abamurika ndetse n’abasura iri murikagurisha.

Mu butumwa yagejeje ku bitabiriye iki gikorwa, Guverineri Mugabowagahunde yashimiye abamurika n’abandi bagize uruhare mu itegurwa ry’iri murikagurisha, agaragaza ko ibikorwa byabo bigira uruhare rukomeye mu iterambere ry’Intara y’Amajyaruguru n’Igihugu muri rusange.

Yashishikarije abaryitabiriye gukoresha neza amahirwe atangwa n’iri murikagurisha, barushaho guteza imbere ubufatanye, kwagura ishoramari, gukoresha ikoranabuhanga no guhanga udushya, hagamijwe kongera umusaruro no guteza imbere ibikorwa by’ubucuruzi.

Guverineri Mugabowagahunde kandi yashimangiye ko kuzamura ireme ry’ibicuruzwa na serivisi ari ingenzi, by’umwihariko hibandwa ku buziranenge bwabyo kugira ngo birusheho kugira agaciro no guhangana ku masoko yo mu gihugu ndetse no ku rwego mpuzamahanga.

Hanagarutswe ku kamaro ko kurushaho kunoza ubufatanye hagati y’abikorera n’inzego za Leta, ndetse no guteza imbere ishoramari ritanga imirimo, cyane cyane ku rubyiruko, kugira ngo rubone amahirwe arambye yo kwihangira imirimo no kwiteza imbere.

Imurikagurisha ry’Intara y’Amajyaruguru 2026 ryatangiye ku itariki ya 19 Kanama 2026, rikazasoza ku itariki ya 2 Nzeri 2026. Kugeza ku itariki ya 22 Kanama, ryari rimaze kwitabirwa n’abamurika 145, barimo abanyamahanga batandatu.

Iri murikagurisha ni umwanya w’ingenzi wo kumurika ibikorwa, ibicuruzwa na serivisi bikorerwa mu Ntara y’Amajyaruguru ndetse n’ahandi mu gihugu, guteza imbere ubucuruzi n’ishoramari, no kongera imikoranire hagati y’abikorera, inzego za Leta n’abandi bafatanyabikorwa mu iterambere.

Rinagamije kandi gufasha abamurika kubona amasoko mashya, kumenyekanisha ibicuruzwa na serivisi byabo, kungurana ubumenyi n’ubunararibonye ndetse no kubaka imikoranire mishya ishobora gukomeza guteza imbere ubucuruzi n’ishoramari.

Abitabiriye iri murikagurisha barasabwa gukoresha neza uyu mwanya, bakamenyekanisha ibikorwa byabo, bagashaka abafatanyabikorwa bashya kandi bakubaka imikoranire izakomeza kubyara umusaruro no nyuma y’isozwa ry’iri murikagurisha.