COVID-19: KU IKUBITIRO INTARA Y’AMAJYARUGURU YAKIRIYE INKINGO ZO MU BWOKO BWA ASTRAZENECA IBIHUMBI 40

Ibi ni ibyatangajwe na Guverineri w’Intara y’Amajyaruguru, Hon Gatabazi Jean Marie Vianney, ubwo ku gicamunsi cyo kuri uyu wa kane tariki ya 04 Werurwe 2021, ari kumwe n'Umuyobozi w'Akarere ka Musanze, Madamu Nuwumuremyi Jeannine ndetse n’Umuyobozi w’Ibitaro Bikuru bya Ruhengeri, Dr Muhire Philbert, bakiraga icyiciro cya mbere cy'inkingo za COVID-19 ibihumbi cumi na magana atanu zigenewe Ibigo Nderabuzima cumi na bitandatu biherereye mu Karere ka Musanze.

Guverineri Gatabazi yavuze ko igikorwa cyo gukingira abaturage COVID-19 mu Ntara y’Amajyaruguru kizatangira kuri uyu wa gatanu tariki 05 Werurwe kandi ko iyi Ntara yagenewe inkingo zo mu bwoko bwa Astrazeneca ibihumbi mirongo ine muri iki cyiciro cya mbere. Yasabye abaturage batoranyijwe gukingirwa ku ikubitiro COVID-19 kuzitabira iki gikorwa uko bikwiye ndetse asaba n’abasigaye gutegerezanya icyizere kuko na bo inkingo zizabageraho mu gihe kiri imbere.